The news is by your side.

Advertisement

کراچی میں صفائی ستھرائی اور کچرہ اٹھانے کی ذمہ داری ڈسٹرکٹ میونسپل کارپوریشن کی ہے، سعید غنی

کراچی: وزیر بلدیات سندھ سعید غنی کا کہنا ہے کہ کراچی میں پانی، سیوریج اور کچرے کے مسائل کے حل کے لیے سندھ حکومت سنجیدہ ہے۔

تفصیلات کے مطابق وزیر بلدیات سندھ سعید غنی نے کہا کہ کراچی میں صفائی ستھرائی اور کچرہ اٹھانے کی قانونی طور پر ذمہ داری ڈسٹرکٹ میونسپل کارپوریشن کی ہے لیکن ان کی ایماء اور کونسل کی منظوری کے بعد 4 اضلاع میں یہ ذمہ داری سندھ سولڈ ویسٹ مینجمنٹ کو سونپی گئی ہیں۔

سعید غنی نے کہا کہ لوکل گورنمنٹ ایکٹ 2013 کے تحت کے ایم سی اور ڈی ایم سیز کو جو اختیارات ملنے ہیں وہ تمام انہیں دیے گئے ہیں اور اب ہم جلد ہی انہیں پراپرٹی ٹیکس کے جمع کرنے کا اختیار بھی سپرد کرنے جا رہے ہیں۔

وزیر بلدیات سندھ نے کہا کہ میئر کراچی وسیم اختر کی جانب سے یہ تاثر دیا جا رہا ہے کہ ہم شاید ان کو جو اختیارات سندھ لوکل گورنمنٹ ایکٹ 2013 میں ہیں وہ ان کو نہیں دے رہے ہیں۔

انہوں نے کہا کہ کچرہ اٹھانے کی مکمل طور پر ذمہ داری ڈی ایم سیز کی ہے اور چند برس قبل جب ڈی ایم سیز اس میں ناکام رہی تو ہم نے ان کی معاونت کے لیے سندھ سولڈ ویسٹ مینجمنٹ بورڈ کا قیام کیا۔

سعید غنی نے کہا کہ سندھ حکومت کراچی سمیت سندھ بھر میں عوامی مفاد میں تمام اسٹیک ہولڈرز کے ساتھ بیٹھ کر مسائل کے حل کے لیے سنجیدہ ہے کیونکہ ہم چاہتے ہیں کہ عوام کو زیادہ سے زیادہ ریلیف دیا جائے۔

Comments

یہ بھی پڑھیں