The news is by your side.

Advertisement

اے آر وائی اورصحافیوں پرحملوں کیخلاف صحافی تنظیموں کے مظاہرے

کراچی : اے آر وائی نیوز اور صحافیوں پر حملوں کے خلاف نیشنل پریس کلب اسلام آباد، سجاد شہید پریس کلب ،آزاد جموں و کشمیر یونین آف جرنلسٹس کی جانب سے احتجاجی مظاہرہ کیا گیا۔

تفصیلات کے مطابق ‏اسلام آباد کے صحافیوں نے اے آر وائی نیوز کے دفتر پر حملے کے خلاف نیشنل پریس کلب کے باہر مظاہرہ کیا۔

صحافیوں نے حملوں کے خلاف پلے کارڈ اٹھا رکھے تھے جن پر صحافت پر حملوں، صحافیوں کو ہراساں کرنے اور دہشت گردی کے خلاف نعرے درج تھے جبکہ صحافی پریس کلب کے باہر دہشت گرد حملوں کے خلاف شدید نعرے بازی بھی کر رہے تھے ۔

احتجاجی مظاہرے سے  افضل بٹ، علی رضا علوی ،لالا اسد پٹھان، راجہ محمد اشرف ، یونین آف جرنلسٹس کے صدر سردار طاہر احمد عباسی ، سابق صدور پریس کلب پرویز الحسن و دیگر نے خطاب کرتے ہوئے اے آر وائی نیوز پر حملوں کی شدید مذمت کرتے ہوئے حکومت پاکستان سے مطالبہ کیا کہ پاکستان اور آزاد کشمیر کے صحافیوں کو تحفظ فراہم کیا جائے۔

انہوں نے کہا کہ دہشت گردوں کی طرف سے اے آر وائی نیوز کو نشانہ بنانے والے دہشت گرد عناصر کو گرفتار کر کے فوری طور پر کارروائی کی جائے ۔

مظاہرے میں ایک قرار داد کے ذریعے پاکستان میں اے آر وائی اور دیگر صحافیوں پر قاتلانہ حملوں کی شدید مذمت کرتے ہوئے وفاقی وزیر داخلہ سے اپیل کی گئی کہ دہشت گردوں کے خلاف گھیرا تنگ کیا جائے اورمیڈیا ہاؤسز اور صحافیوں کو سیکورٹی فراہم کی جائے۔

Comments

comments

یہ بھی پڑھیں