The news is by your side.

Advertisement

اداکارہ صحیفہ جبار نے سوشل میڈیا صارفین کو خطرے سے آگاہ کردیا

کراچی : پاکستان ٹیلی وژن کی وراسٹائل اداکارہ صحیفہ جبار نے سوشل میڈیا پر پھیلے ایسے ٹھگوں اور دھوکے باز لوگوں سے اپنے مداحوں کو خبردار کیا ہے جو مختلف حربوں سے صارفین کو لوٹ رہے ہیں۔

صحیفہ جبار نے انسٹاگرام پر ایک اسٹوری پوسٹ کی جس میں انہوں نے سوشل میڈیا پر جعلی اکاؤنٹس بنا کر صارفین سے پیسے بٹورنے والوں سے ہوشیار رہنے کا مشورہ دیا ہے۔

انہوں نے اپنی پوسٹ میں کہا کہ یہ جو کمنٹ سیکشن میں گھر بیٹھے پیسے کمائیں، اپنی قسمت جانیے جیسے اکاؤنٹس ہوتے ہیں ان سے بچیں اور دوسروں کو بھی بچائیں۔

اداکارہ کا کہنا تھا کہ یہ لوگ صرف پیسے بٹورنے کے چکر میں بیٹھے ہیں اور آپ لوگوں کو بے وقوف بنانا چاہتے ہیں، ہاتھ کی لکیریں دیکھ کر قسمت بتانے والے آپ لوگوں کو شک میں مبتلا کرنے والی باتیں بتائیں گے، جیسے آپ کس طرح اپنی مشکل زندگی کا مقابلہ کررہے ہیں۔

صحیفہ نے کہا کہ وہ آپ سے پوچھیں گے کہ آج کل آپ کسی الجھن میں ہیں اور اس طرح آپ کو باتوں میں گھیر لیں گے مگر آج کل الجھن میں کون نہیں ہے؟

اداکارہ نے اپیل کی کہ اس قسم کے لوگوں کو پیسے ٹرانسفر نا کریں اور ان سے کوئی رابطہ نہیں رکھیں، ان جعلی اکاؤنٹس کو فوری طور پر  رپورٹ کریں۔

خیال رہے کہ سوشل میڈیا پر اس طرح کے کئی واقعات سامنے آچکے ہیں جن میں صارف سے لوگ دھوکہ دہی کے ذریعے پیسے بٹور لیتے ہیں جس کے نتیجے میں ان کا بھاری نقصان ہوجاتا ہے۔

Comments

یہ بھی پڑھیں