The news is by your side.

Advertisement

پی سی بی کے جواب پر سلیم ملک کا ردعمل آگیا

لاہور: پاکستان کرکٹ بورڈ (پی سی بی) کے جواب پر سابق کپتان سلیم ملک کا کہنا ہے کہ پی سی بی میرے ساتھ کھیل کھیل رہا ہے۔

تفصیلات کے مطابق سابق ٹیسٹ کرکٹر سلیم ملک نے اے آر وائی نیوز سے خصوصی گفتگو کرتے ہوئے کہا کہ 2014 میں پی سی بی نے دھوکے سے خط پر دستخط کروائے، پی سی بی حکام پر یقین کرتے ہوئے بغیر پڑھے خط پر دستخط کیے۔

سلیم ملک کا کہنا ہے کہ پی سی بی حکام نے مجھے کلیئر کرنے کی یقین دہانی کرائی تھی، 6 سال پی سی بی دفاتر کے چکر لگاتا رہا لیکن کوئی حل نہ نکالا گیا۔

سابق ٹیسٹ کرکٹر نے کہا کہ پی سی بی کے جواب پر اپنے وکلا سے مشاورت کے بعد پریس کانفرنس کروں گا۔

مزید پڑھیں: پی سی بی کا دانش کنیریا اور سلیم ملک کو کرارا جواب

واضح رہے کہ پی سی بی حکام نے سلیم ملک کو آئی سی سی کی جانب سے میچ فکسنگ کے سوالات کے جواب دینے کا کہا تھا، سلیم ملک کے مئی 2014 کے اعتراف کا حوالہ دیتے ہوئے پی سی بی کا کہنا تھا کہ ان کا جواب دینے سے انکار ان کے اعتراف کو تبدیل نہیں کرسکتا۔

یاد رہے کہ اس سے قبل سلیم ملک کا کہنا تھا کہ کئی کھلاڑیوں کو فکسنگ کی سزا کے بعد کھیلنے یا کوچنگ کا موقع ملا مجھے بھی کوچنگ کا اختیار دیا جائے۔

سلیم ملک پر 2000 میں میچ فکسنگ انکوائری کے بعد تاحیات پابندی لگائی گئی تھی جسے سیشن کورٹ نے آٹھ سال بعد ختم کردیا تھا۔

fb-share-icon0
Tweet 20

Comments

comments

یہ بھی پڑھیں