The news is by your side.

Advertisement

نئے سال کے آغاز پر سلمٰی بی نئے اعزاز کے لیے نام زد

پاکستانی نژاد برطانوی خاتون ایمپائر اور کوچ سلمیٰ بی کو ممبر برٹش ایمپائر (ایم بی ای) ایوارڈ سے نوازا جائے گا جس کے لیے ملکہ برطانیہ نے ان کے نام کی منظوری دے دی ہے۔

نئے سال کی آنر لسٹ میں ان کا نام شامل کرنے کی منظوری کرکٹ کی دنیا میں ان کی خدمات پر دی گئی ہے اور انھیں ایم بی ای ایوارڈ سے نوازا جائے گا۔ سلمیٰ بی خواتین اور معذور افراد میں کرکٹ کے فروغ کے لیے اپنا کردار ادا کررہی ہیں۔

اس حوالے سے ای سی بی کے چیف ایگزیکٹیو افسر ٹام ہیریسن کا کہنا ہے کہ ’سلمیٰ بی اس ایوارڈ کی حق دار ہیں اور وہ ایک مثالی خاتون ہیں جنھوں نے خواتین کے لیے کرکٹ کی راہ ہم وار کی۔‘

سلمیٰ بی جنوبی ایشیا سے تعلق رکھنے والی پہلی خاتون ایمپائر ہیں، انھیں برطانیہ میں کاؤنٹی کرکٹ کھیلنے والی پہلی برٹش مسلمان خاتون کا اعزاز بھی حاصل رہا ہے۔

اعزاز کے لیے نام زد ہونے پر انھوں نے سوشل میڈیا پر اپنی ایک پوسٹ میں‌ خوشی کا اظہار کیا ہے۔

پاکستانی نژاد سلمیٰ 2009 میں بہترین کارکردگی کا مظاہرہ کرنے پر ایشین ایوارڈ بھی اپنے نام کرچکی ہیں۔

Comments

یہ بھی پڑھیں