تازہ ترین

سانپ کے ڈسنے سے زخمی سلمان خان اسپتال سے ڈسچارج، تصاویر سامنے آگئیں

بالی ووڈ کے دبنگ اداکار سلمان خان کو بھارتی ریاست مہاراشٹرا کے شہر پنویل میں ان کے ایک فارم ہاؤس میں سانپ نے ڈس لیا تھا۔

بھارتی میڈیا رپورٹس کے مطابق سلمان خان ہفتے اور اتوار کی درمیانی شب اپنے فارم ہاؤس میں موجود تھے جہاں انہیں سانپ نے ڈس لیا جس کے فوری بعد انہیں ممبئی کے ایک نجی اسپتال منتقل کر دیا گیا۔

دوسری جانب ان کے والد سلیم خان کا کہنا ہے کہ ان کا بیٹا بالکل ٹھیک ہے اور اب اسے اسپتال سے فارغ بھی کردیا گیا ہے اور پریشانی والی کوئی بات نہیں ہے۔

بتایا جارہا ہے کہ سلمان خان کی اتوار کی صبح اسپتال لے جایا گیا تھا جہاں 6 گھنٹے تک رکھنے کے بعد انہیں ڈسچارج کردیا گیا۔

یہ اطلاع آنے کے بعد سے ان کے پرستار ان کی صحت و زندگی کے حوالے سے پریشانی کا شکار تھے، جسے دور کرنے کے لیے ان کے والد نے اپ ڈیٹ دیتے ہوئے کہا کہ سلمان خان مکمل طور پر تندرست اور خطرے سے باہر ہیں۔

انہوں نے کہا کہ ویسے بھی جنگلوں میں پایا جانے والا یہ سانپ زہریلا نہیں تھا۔ والد کا کہنا تھا کہ ڈاکٹروں نے سلمان کو چند دوائیں تجویز کی ہیں، تاہم وہ اب مکمل تندرست ہیں۔

سلمان خان کے اسپتال سے جانے کے بعد ان کی تصاویر بھی سامنے آئیں ہیں، جس میں وہ فلم ’میں نے پیار کیوں کیا‘ میں ان کی ماں کا کردار نبھانے والی بینا کاک کے ساتھ نظر آرہے ہیں۔

سلمان خان اپنی اس تصویر میں سیاہ شرٹ میں ملبوس نظر آرہے ہیں جبکہ ان کے عقب میں بنے پلرز رنگین غباروں سے سجے نظر آرہے ہیں، جو ان کی سالگرہ کے لیے سجائے گئے ہیں۔

اسپتال سے ڈسچارج ہونے کے بعد میڈیا سے بات چیت کرتے ہوئے سلمان خان کہا کہ ان کے فارم ہاؤس کے ایک کمرے میں سانپ گھس آیا تھا اور بچے ڈر رہے تھے تو وہ وہاں پہنچ گئے اور کہا کہ انھیں ایک لکڑی دی جائے۔

انہیں جو لکڑی دی گئی وہ کافی چھوٹی تھی، لمبی لکڑی منگوائی اور بڑے پیار سے سانپ کو باہر لے آیا، سانپ لکڑی پر چڑھ کر میرے ہاتھ پر آگیا اور میں نے اسے چھوڑنے کیلئے پکڑ لیا اس کے بعد سانپ نے مجھے تین بار کاٹا اس کے بعد میں نے سانپ کو چھوڑدیا۔

Comments

- Advertisement -