ممبئی(20 مئی 2026): بالی ووڈ کے سلیبرٹی اداکار سلمان خان نے اسپتال کے باہر پیش آنے والے واقعے پر اپنی خاموشی توڑ دی ہے۔
بالی ووڈ کے سلو بھائی، اداکار سلمان خان نے انسٹاگرام پر اپنی چند سیلفیز شیئر کرتے ہوئے پاپرازی کے غیر حساس رویے پر سخت ناراضگی کا اظہار کیا ہے۔
منگل کی رات سپر اسٹار کو ممبئی کے ہندوجا اسپتال کے باہر دیکھا گیا تھا، جہاں وہ مبینہ طور پر خاندان کے ایک بیمار رکن کی عیادت کے لیے گئے تھے۔ جب وہ اسپتال سے باہر نکلے تو فوٹوگرافرز نے جارحانہ انداز میں ان کی گاڑی کا پیچھا کیا، ان کا نام پکارا اور ویڈیو بنانا شروع کر دی۔
اس موقع پر سلمان خان سخت غصے میں نظر آئے اور انہوں نے ہجوم کو ڈانٹا، جس کی ویڈیوز فوری طور پر انٹرنیٹ پر وائرل ہو گئیں۔
اس واقعے کے چند گھنٹے بعد کوئی روایتی پریس ریلیز جاری کرنے کے بجائے سلمان خان نے سوشل میڈیا کا رخ کیا اور غصے سے بھرپور تاثرات والی اپنی چند قریبی سیلفیز پوسٹ کر کے اپنے دل کی بات کہی۔
اپنی پوسٹ میں اداکار نے براہِ راست میڈیا کو مخاطب کیا جس کے ساتھ ان کا دہائیوں سے خوشگوار تعلق رہا ہے۔ انہوں نے لکھا اگر میں اسپتال میں کسی پریس والے کو میری تکلیف کا تماشہ بناتے دیکھوں گا، وہ پریس جس کے ساتھ میں ہمیشہ کھڑا رہا، بات چیت کی، ان کا خیال رکھا اور اس بات کو یقینی بنایا کہ وہ بھی اپنی روزی روٹی کما سکیں، لیکن اگر وہ میری تکلیف سے پیسہ کمانا چاہتے ہیں تو خاموش رہیں اور اس کا تماشہ نہ بنائیں۔
سلمان خان نے اس بات پر بھی گہرے دکھ کا اظہار کیا کہ کس طرح اس نجی بحران کے وقت ہجوم ان کی آنے والی فلم کا نام پکار رہا تھا۔ انہوں نے مزید لکھا "یہ سب ‘بھائی بھائی بھائی’ اور ‘ماتربھومی’ کے نعرے فلم جائے جہنم میں، کیا کوئی تصویر زیادہ اہم ہے یا کسی کی زندگی؟
اس کے بعد سپر اسٹار کا لہجہ مزید سخت ہو گیا اور انہوں نے حدود پار کرنے والے فوٹوگرافرز کو براہِ راست وارننگ دیتے ہوئے کہا ایک بھائی کے دکھ پر اگلی بار میرے ساتھ ایسا کرنے کی کوشش کر کے دیکھنا، بس ایک بار کوشش کرنا۔۔۔۔ جب تمہارا کوئی اپنا اسپتال میں ہوگا تو کیا میں ایسا رویہ اختیار کروں گا؟
انہوں نے اپنی بات جاری رکھتے ہوئے لکھا "میں 60 سال کا ہو گیا ہوں لیکن لڑنا نہیں بھولا، یہ بات یاد رکھنا۔ زیادہ سے زیادہ کیا ہوگا؟ جیل میں ڈال دو گے، ہا ہا!”
اگرچہ پوسٹ کے آخر میں "ہا ہا” لکھ کر انہوں نے طنز و مزاح کا تڑکا لگایا، لیکن سلمان خان کا یہ پیغام ہندی سنیما میں حد سے بڑھتی ہوئی پاپرازی ثقافت کے خلاف ایک سخت انتباہ ہے۔
ان کی اس پوسٹ کے بعد مداحوں کی بڑی تعداد ان کی حمایت میں سامنے آئی ہے اور ان کے غصے کو بالکل جائز قرار دیا ہے، جبکہ کئی معروف شخصیات نے بھی اس رویے پر تشویش کا اظہار کیا ہے۔
واضح رہے کہ سلمان خان جلد ہی فلم ‘ماتربھومی’ میں نظر آئیں گے، جو اگست 2026 میں یومِ آزادی کے موقع پر ریلیز کے لیے تیار ہے۔ اس فلم کے علاوہ ان کے پاس فلم ساز ومشی پیڈی پلی کی اگلی فلم اور یش راج فلمز کے اسپائی ورس کا بڑا پروجیکٹ ‘ٹائیگر ورسز پٹھان’ بھی شامل ہیں۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں