The news is by your side.

Advertisement

وزیراعظم نے قوم سے سچ بولا سب کوساتھ دینا ہوگا، صمصام بخاری

لاہور : وزیر اطلاعات پنجاب صمصام علی بخاری نے کہا وزیر اعظم کا قوم کے نام پیغام وقت کی آواز ہے ، انھوں نے قوم سے سچ بولا سب کوساتھ دینا ہوگا، عمران خان کا مشن ملک کوآگے لے جانا ہے۔

تفصیلات کے مطابق وزیر اطلاعات پنجاب صمصام علی بخاری نے وزیر اعظم عمران خان کے پیغام پرتبصرہ کرتے ہوئے کہا وزیر اعظم کا قوم کے نام پیغام وقت کی آواز ہے، عمران خان ملک وقوم کو اپنے پاؤں پرکھڑا کرناچاہتے ہیں۔

وزیراطلاعات پنجاب کا کہنا تھا ماضی میں ملک لوٹاگیا،ہم خزانہ دوبارہ بھرنا چاہتے ہیں، ترقی یافتہ ملکوں کی طرح ٹیکس نیٹ میں اضافہ کرنا ہوگا، عوام ملک کی تعمیر وترقی میں اپنا کردار ادا کریں گے۔

صمصام بخاری نے کہا قیادت نیک نیت ہو تو ہر شہری ساتھ دے گا، عمران خان کا مشن ملک کوآگے لے جانا ہے، کرپشن کرنے والے “اسٹیٹس کو” کےحامی ہیں۔

ان کا مزید کہنا تھا خزانہ لوٹا نہ جاتا توآج ملک کے یہ حالات نہ ہوتے، وزیراعظم نے قوم سے سچ بولا سب کوساتھ دینا ہوگا، اپوزیشن بھی وسیع ترقومی مفادمیں حکومت کاساتھ دے، اربوں روپےکی کرپشن کرنیوالےعوام کودوبارہ گمراہ نہیں کرسکیں گے۔

مزید پڑھیں : تمام لوگ اثاثے ظاہر کرنے کی اسکیم کا حصہ بنیں: وزیر اعظم کی قوم سے اپیل

یاد رہے وزیراعظم عمران خان نے قوم سے خطاب میں پاکستانیوں سےاثاثےظاہرکرنےکی اسکیم کاحصہ بننےکی اپیل کرتے ہوئے پیغام میں کہا تیس جون تک بےنامی اثاثے،اکاؤنٹس اورجائیدادیں ظاہرکردیں، تیس جون کے بعد موقع نہیں ملےگا، ہمارے پاس جومعلومات ہیں وہ پہلے کسی حکومت کے پاس نہیں تھیں۔

عمران خان کا کہنا تھا ہماری قوم میں صلاحیت موجود ہے، جذبہ آگیا تو ہم لوگ 10 ہزار ارب ہر سال اکٹھا کرسکتے ہیں، اثاثے ظاہر کرنے کی اسکیم سے فائدہ اٹھائیں اور ملک کو فائدہ دیں ۔

انھوں نے کہا تھا 10سال میں پاکستان کاقرض6ہزار ارب سے 30 ہزار ارب پہنچ گیا ہے، 2 ہزار ارب صرف قرضوں کی قسطوں میں چلے جاتے ہیں، بچ جانے والے پیسے سے ملک کے خرچ پورے نہیں ہوسکتے، ٹیکس نہیں دیں گے تو ہمارا ملک اوپر نہیں اٹھےگا۔

Comments

comments

یہ بھی پڑھیں