کراچی: سام سنگ نوٹ 7 کے بعد کلیگسی 4 میں بھی جارجنگ کے دوران موبائل فون میں آگ لگنے اور پھٹنے کا ایک واقعہ پیش آگیا، یہ دنیا کے کسی اور ملک نہیں بلکہ پاکستان کے ایک صارف کے ساتھ پیش آیا۔
سماجی رابطے کی ویب سائٹ پر سام سنگ گلیگسی نوٹ 4 کے صارف نے ٹوئٹ میں شکایت کی ہے کہ اُن کا اسمارٹ فون چارجنگ کے دوران پھٹ جانے کے باعث مکمل تباہ ہوگیا ہے۔
آفتاب آفریدی نامی صارف نے اپنے ٹوئیٹر آئی ڈی سے اسمارٹ فون پھٹنے کی تصاویر شائع کی ہیں، ٹوئیٹر آئی ڈی میں ڈالی گئی معلومات کے مطابق متاثرہ شخص اسلام آباد میں سافٹ انجئیر ہیں۔
آفتاب نے اپنے ٹوئٹ میں کہا کہ ’’گزشتہ رات معمول کے مطابق اپنا فون چارج پر لگاکر سو ئے تو اچانک اُن کے کمرے میں زور دار دھماکے کی آواز آئی جس سے اُن کی آنکھ کھل گئی‘‘۔
انہوں نے کہا جب آنکھ کھلی تو کمرہ دھوئیں سے بھرا ہوا تھا، جس کے بعد انہوں نے چارجنگ کیبل کو فون سے علیحدہ کر دیا تاہم اس دوران اُن کی انگلیاں جل گئیں۔
آفتاب آفریدی کا کہنا ہے کہ انہوں نے اسلام آباد میں واقع سام سنگ کمپنی سے رابطہ کیا تو انتظامیہ کی جانب سے کوئی جواب نہیں آیا، اُن کا کہنا ہے کہ بعد ازاں ’’میں نے فیس بک کے ذریعے سام سنگ کمپنی سے بذریعہ میسج رابطہ کیا مگر انہوں نے کوئی جواب نہیں دیا‘‘۔
سام سنگ کی جانب سے کوئی جواب نہ دینے کے بعد متاثرہ صارف نے ٹوئیٹر پر ایک ٹرینڈ #SamsungRiskedAftabsLife شروع کیا جو کچھ ہی دیر میں ٹاپ ٹرینڈ بن گیا اور سماجی رابطے کی ویب سائٹ پر موجود صارفین نے آفتاب کے ساتھ اظہار یکجہتی کرتے ہوئے اپنا حصہ ڈالا۔
