The news is by your side.

Advertisement

امریکا میں گیس لیکیج کے باعث دھماکا، عمارتوں میں آگ لگ گئی

واشنگٹن: امریکا میں گیس لیکیج کے باعث دھماکے  سے آگ لگ گئی، جس نے پانچ عمارتوں کو اپنی لپیٹ میں لے لیا۔

تفصیلات کے مطابق امریکی شہر سان فرانسسکو میں گیس لیکیج سے دھماکے کے بعد آگ لگ گئی، آگ نے پانچ عمارتوں کو لپیٹ میں لے لیا۔

غیر ملکی خبر رساں ادارے کا کہنا ہے کہ دھماکے کے باعث لگنے والی آگ سے سان فرانسسکو کا مشہور ریستوران کا بڑا حصہ بھی جل کر خاک ہوگیا۔

فائر فائٹرز نے دو گھنٹے کوششوں کے بعد آگ پر قابو پالیا، خوش قسمتی سے کوئی جانی نقصان نہیں ہوا، تاہم مختلف علاقوں میں گیس کی فراہمی اب تک معطل ہے، بجلی بحال کردی گئی۔

واقعے کے حوالے سے تحقیقات کے لیے 8 رکنی ٹیم واشنگٹن سے سان فرانسسکو پہنچ رہی ہے جو دھماکے سے متعلق باریکی سے تحقیقات کرے گی۔

انتظامیہ کا کہنا ہے کہ گیس لائن کی مرمت کا کام شروع کردیا گیا ہے تاہم سنگین صورت حال کے باعث کام مکمل ہونے میں تھوڑا وقت لگے گا۔

علاوہ ازیں گذشتہ روز امریکی شہراٹلینٹا میں زیرزمین مین ہول میں یکے بعد دیگرے دس دھماکے ہوئے تھے، جس کے باعث چاروں طرف دھوئیں کے بادل چھاگئے اور شہری سہم گئے تھے۔

امریکا میں زیرزمین دھماکے، شہریوں میں شدید خوف وہراس

قبل ازیں گذشتہ سال جون میں امریکی ریاست ٹیکساس کے اسپتال میں زیر تعمیر حصّے میں دھماکے کے نتیجے میں ایک شخص ہلاک جبکہ 12 افراد زخمی ہوگئے تھے۔

خیال رہے کہ جون میں ہی میکسیکو میں آتش بازی کا سامان بنانے والی کمپنی میں یکے بعد دیگرے دھماکوں کے نتیجے میں 49 شہری زخمی جبکہ 24 افراد ہلاک ہوگئے تھے۔

Comments

comments

یہ بھی پڑھیں