نئی دہلی: بھارتی ٹینس اسٹار اور قومی کرکٹر شعیب ملک کی اہلیہ ثانیہ مرزا کا کہنا ہے کہ سشانت سنگھ نے ایک ساتھ ٹینس کھیلنے کا وعدہ کیا تھا جو اب پورا نہیں ہوسکے گا۔
تفصیلات کے مطابق بھارتی ٹینس اسٹار ثانیہ مرزا نے سماجی رابطے کی ویب سائٹ ٹویٹر پر سشانت سنگھ کی اچانک موت پر دکھ کا اظہار کرتے ہوئے کہا کہ وہ سشانت کی موت کی خبر سن کر شدید رنجیدہ ہیں، وہ اپنی خوش مزاجی کی وجہ سے جہاں جاتے تھے ایک خوشی کا ماحول بنادیتے تھے۔
ثانیہ مرزا نے لکھا کہ اس مسکراہٹیں پھیلاتے چہرے اور دل کے پیچھے سشانت سنگھ کتنے غم چھپائے ہوئے تھے اور وہ دنیا سے بری طرح مایوس کیوں ہوچکے تھے یہ سب ہم جاننے سے قاصر رہے۔
Sushant 💔 💔 you said we would play tennis together one day .. you were so full of life and laughs .. spreading smiles everywhere you went.. we didn’t even know you were hurting this bad 😞 the world will miss you .. shaking while I write this .. RIP my friend
— Sania Mirza (@MirzaSania) June 14, 2020
انہوں نے کہا کہ سشانت یہ دنیا آپ کو ہمیشہ یاد رکھے گی، ثانیہ مرزا نے بتایا کہ سشانت کی موت کی خبر سننے کے بعد یہ پیغام لکھتے وقت ان پر کپکپی طاری ہوگئی ہے۔
مزید پڑھیں: کیا سشانت سنگھ راجپوت کو قتل کیا گیا؟
واضح رہے کہ دو روز قبل 34 سالہ اداکار سشانت سنگھ راجپوت نے خودکشی کرلی تھی، اداکار کی پھندا لگی لاش گھر سے برآمد ہوئی تھی، وہ لاک ڈاؤن کے باعث ممبئی کے علاقے باندرا میں تنہائی کی زندگی گزار رہے تھے۔ اداکار نے ’رابطہ‘ اور ’کیدرناتھ‘، ’پی کے‘، ’ایم ایس دھونی‘، جیسی مشہور فلموں میں اپنی صلاحیتوں کے جوہر دکھائے۔
سشانت سنگھ راجپوت کے چچا نے حکومت اور قانون نافذ کرنے والے اداروں سے اپیل کی تھی کہ وہ سشانت کی موت کی تحقیقات کریں تو اصل حقائق سامنے آجائیں گے۔
