The news is by your side.

Advertisement

سنجے دت کی زندگی پر مبنی فلم ’’سنجو‘‘ کا ٹیزر ریلیز کردیا گیا

ممبئی: بالی ووڈ اداکار سنجے دت کی زندگی پر مبنی فلم ’’سنجو‘‘ کے پہلے ٹیزر نے ریلیز کے ساتھ ہی دھوم مچادی۔

تفصیلات کے مطابق بالی ووڈ اداکار سنجے دت کی زندگی پر بنائی جانے والی فلم ’’سنجو‘‘ کا پہلا ٹیزر ریلیز کردیا گیا ہے، فلم میں مرکزی کردار رنبیر کپور ادا کررہے ہیں۔

فلم سنجو کی ہدایت کاری کے فرائض سنجے دت کے قریبی دوست راج کمار ہیرانی نے انجام دئیے ہیں، راج کمار ہیرانی نے ہی سوشل میڈیا ویب سائٹ ٹویٹر پر فلم کا پہلا ٹیزر ریلیز کیا ہے جسے مداحوں کی جانب سے بے حد سراہا جارہا ہے۔

ایک منٹ 25 سیکنڈ دورانیے پر مشتمل ٹیزر میں سنجے دت کی زندگی کے اتار چڑھاؤ کو دکھایا گیا ہے کہ وہ کس طرح جیل گئے اور پھر جیل سے رہا ہوکر دوبارہ فلمی دنیا میں اداکاری کے جوہر دکھائے۔

ٹیزر میں رنبیر کپور جیل سے باہر نکلتے ہوئے کہہ رہے ہیں کہ ان کی زندگی ایسی ہے کبھی اوپر تو کبھی نیچے، 22 سال کی عمر میں اتنا نشہ کیا کہ پھپھڑوں نے جواب دے دیا اور ڈاکٹر نے کہا اس کا چیپٹر بند ہوگیا ہے لیکن ہوا کیا نہیں نا، پھر ایسی باڈی بنائی کہ لوگ باکسر محمد علی سے موازنا کرنے لگے۔

رنبیر کپور کا ایسا گیٹ اپ کیا گیا ہے جس میں وہ بالکل سنجے دت کی طرح نظر آرہے ہیں، اس سے قبل راج کمار ہیرانی اور رنبیر کپور کے درمیان فلم کے نام کو لے کر تنازع چل رہا تھا جو ٹیزر کی ریلیز کے ساتھ ہی حل ہوگیا ہے اور فلم کا نام ’’سنجو‘‘ رکھ دیا گیا ہے۔

فلم سنجو میں رنبیر کپور کے علاوہ دیگر کاسٹ میں پاریش راول، منیشا کوئرالا، سونم کپور، انوشکا شرما، دیا مرزا شامل ہیں جبکہ فلم رواں سال جون میں ریلیز ہوگی تاہم ٹیزر دیکھتے ہی مداحوں کو فلم کی ریلیز کا شدت سے انتظار ہے۔

ویڈیو دیکھیں


خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

Comments

comments

یہ بھی پڑھیں