جہلم : برطانیہ میں مردہ پائی جانے والی بچی سارہ شریف کی سوتیلی ماں نے دعویٰ کیا کہ سارہ کی موت ایک حادثہ ہے ، وہ سیڑھیوں سے گری۔
تفصیلات کے مطابق برطانیہ میں پاکستانی نژاد بچی سارہ شریف کی پراسرار ہلاکت کے معاملے پر سوتیلی ماں کا ویڈیو بیان سامنے آگیا۔
برطانیہ میں مردہ پائی جانے والی بچی سارہ شریف کی سوتیلی ماں بینش بتول نے بیان میں کہا کہ سارہ سیڑھیوں سے گری، موت ایک حادثہ ہے، جو بھی ہو رہا ہے اس سے ہماری فیملی شدید متاثر ہوئی ہے۔
بینش بتول کا کہنا تھا کہ میرے شوہرعرفان کے والد نے ایسا کوئی بیان نہیں دیا ،ہمارا خاندان خوف کا شکار ہے ، بچے اسکول نہیں جارہے،برطانوی حکام سے تعاون کرنے کو تیار ہیں، اپنا مقدمہ عدالت میں لڑیں گے۔
بینش بتول نے خاوند کیساتھ بیٹھ کر نامعلوم مقام پر ویڈیو پیغام ریکارڈ کیا۔
یاد رہے برطانیہ میں دس سالہ پاکستانی نژاد لڑکی کی پراسرار موت کے بعد برطانوی پولیس کو فرار ہونے والے مقتولہ بچی کے والد اور سوتیلی والدہ کی تلاش ہے۔
برطانوی پولیس کی درخواست پر جہلم میں مقتولہ بچی کے باپ ملک عرفان شریف کے بھائیوں کو حراست میں لیا تھا۔
خیال رہے برطانوی پولیس کو دس سالہ سارہ شریف کی لاش دس اگست کو گھرسے ملی تھی، جس کے بعد سے اس کا باپ ملک عرفان دوسری بیوی اور چار بچوں سمیت غائب تھا، جن کےبارے میں پتہ چلا کہ وہ پاکستان پہنچ گئے ہیں۔
برطانوی پولیس نے عرفان شریف کے خاندان کی تلاش کے لیے ایف آئی اے سےرابطہ کیاتھام پولیس کے مطابق ملزم ملک عرفان بیوی بچوں سمیت آزاد کشمیرمیں روپوش ہے جبکہ جاں بحق ہونے والی ساراشریف ملک عرفان کی پہلی بیوی سےتھی۔
