واشنگٹن: ترجمان وائٹ ہاؤس سارہ سینڈرز کا کہنا ہے کہ سرحدی سیکیورٹی پرڈیموکریٹس کے ساتھ بات چیت جاری ہے۔
تفصیلات کے مطابق امریکا میں شٹ ڈاؤن کے خاتمے کے بعد وائٹ ہاؤس کی ترجمان سارہ سینڈرز نے پہلی پریس کانفرنس کی، نیشنل سیکیورٹی ایڈوائزر جان بولٹن، سیکریٹری خزانہ اسٹیون بھی ان کے ہمراہ موجود تھے۔
ترجمان وائٹ ہاؤس سارہ سینڈرز کا کہنا تھا کہ امریکی صدرڈونلڈ ٹرمپ امیگریشن نظام کوٹھیک کرنے کی کوشش کررہے ہیں۔
سارہ سینڈرز کا مزید کہنا تھا کہ سرحدی سیکیورٹی پرڈیموکریٹس کے ساتھ بات چیت جاری ہے، ڈیموکریٹس کے کئی ارکان سرحدوں کی سیکیورٹی کو یقینی بنانا چاہتے ہیں۔
امریکی قومی سلامتی کے مشیر جان بولٹن نے کہا ہے کہ وینزویلا کے7 ارب ڈالرکے اثاثے منجمد کرنے جا رہے ہیں، نکولس موڈارو وینزویلا کے آئینی صدرنہیں رہے۔
امریکا میں شٹ ڈاؤن ختم، صدر ٹرمپ اور کانگریس کے درمیان معاہدہ طے پا گیا
یاد رہے کہ امریکی صدر ڈونلڈ ٹرمپ نے 26 جنوری کو عارضی طور پر 15 فروری تک سرکاری اداروں میں شٹ ڈاؤن ختم کردیا تھا۔
واضح رہے کہ امریکی صدر ڈونلڈ ٹرمپ نے دیوار کی تعمیر کے لیے 5.7 بلین ڈالرز منظور کرنے کا مطالبہ کررکھا ہے تاہم کانگریس میں ڈیموکریٹس دیوار کی فنڈنگ کی منظوری سے مسلسل انکاری ہیں، ڈیل میں کیا بات طے پائی اس سے متعلق مکمل تفصیلات سامنے نہیں آئیں۔
