The news is by your side.

Advertisement

کشمیری عوام حالت جنگ میں ہیں، اپنی صفوں میں اتحاد کی ضرورت ہے، سردار مسعود خان

اسلام آباد : آزاد جموں وکشمیر کے صدر سردار مسعود خان نے کہا ہے کہ کشمیری عوام حالت جنگ میں ہیں اس کا مقابلہ کرنے کے لیے اپنی صفوں میں اتحاد کی ضرورت ہے، تمام اختلافات بھلا کر یکجہتی کا مظاہرہ کریں۔

ان خیالات کا اظہار انہوں نے اسلام آباد میں جماعت اسلامی کے زیر اہتمام کشمیر بچاؤ مارچ سے خطاب کرتے ہوئے کیا، انہوں نے کہا کہ تجویز دی ہے کہ مسئلہ کشمیر پر پاکستان میں کل جماعتی کشمیر کانفرنس بلائی جائے، کل جماعتی کشمیر کانفرنس میں لائحہ عمل طے کیا جائے۔

ان کا کہنا تھا کہ جموں وکشمیر کے عوام کی طرف سے جماعت اسلامی کو خراج تحسین پیش کرتا ہوں، جس بے باکی، اعتماد اور ولولے کے ساتھ جماعت اسلامی نے کشمیریوں کا ساتھ دیا ہے، کشمیریوں کی نسلیں اِس کو یاد رکھیں گی، سیاسی جماعتیں اختلافات بھلا کر یکجہتی کا مظاہرہ کریں۔

سردار مسعود خان نے کہا کہ عوام مسئلہ کشمیر پر کسی سودے بازی کی اجازت نہیں دیں گے ،72سال سے کشمیری پاکستان کی تکمیل بقاء کی جنگ لڑرہے ہیں،141دن سے کشمیریوں کو اپنے گھروں میں محصور کر کے رکھا گیا ہے۔

صدر آزاد کشمیر نے کہا کہ کشمیریوں کو ہندوستان کی جیلوں میں لے جا کر مظالم ڈھائے جارہے ہیں، 31اکتوبر کو مقبوضہ کشمیر کے حصے بخرے کردیے گئےہیں۔ ہم حالت جنگ میں ہیں اس جنگ کا مقابلہ کرنے کے لیے اپنی صفوں میں اتحاد کی ضرورت ہے۔

انہوں نے مزید کہا کہ یہ پاکستان کے بقاء کی جنگ ہے، دہشت گرد ہندوستان پاکستان پر الزامات لگا رہا ہے، ہندوستان نے پاکستان کے اندر درپردہ جنگ شروع کررکھی ہے ہندوتوا کے نظریے کے تحت ہندوستان اکھنڈ بھارت کا خواب دیکھ رہا ہے۔

Comments

یہ بھی پڑھیں