کراچی(15 مارچ 2026): پاکستان کرکٹ ٹیم کے سابق کپتان اور مایہ ناز وکٹ کیپر بلے باز سرفراز احمد نے بین الاقوامی کرکٹ سے باقاعدہ ریٹائرمنٹ کا اعلان کر دیا ہے۔
سرفراز احمد نے اپنے طویل کیریئر میں پاکستان کی جانب سے 54 ٹیسٹ، 117 ون ڈے اور 61 ٹی ٹوئنٹی انٹرنیشنل میچز کھیلے۔ سرفراز احمد کا شمار پاکستان کے کامیاب ترین کپتانوں میں ہوتا ہے جن کی قیادت میں پاکستان نے 2017 میں بھارت کو شکست دے کر آئی سی سی چیمپئنز ٹرافی جیتی۔
وہ دنیا کے واحد کپتان ہیں جنہوں نے جونیئر (انڈر 19 ورلڈ کپ) اور سینئر دونوں سطح پر آئی سی سی ٹائٹل جیتے۔ ان کی قیادت میں ہی پاکستان ٹی ٹوئنٹی رینکنگ میں طویل عرصے تک پہلے نمبر پر رہا۔ انہوں نے مجموعی طور پر 100 انٹرنیشنل میچز میں قومی ٹیم کی قیادت کی۔
اپنے کیریئر کے دوران سرفراز احمد نے مجموعی طور پر 6 ہزار 164 رنز بنائے جبکہ وکٹوں کے پیچھے 315 کیچز اور 56 اسٹمپس کیے۔ ان کی شاندار خدمات کے اعتراف میں حکومتِ پاکستان نے انہیں 2018 میں ‘پرائڈ آف پرفارمنس’ سے بھی نوازا تھا۔
ریٹائرمنٹ کے موقع پر جذباتی گفتگو کرتے ہوئے سرفراز احمد نے کہا کہ پاکستان کی نمائندگی کرنا ان کی زندگی کا سب سے بڑا اعزاز رہا اور تینوں فارمیٹس میں قیادت کرنا ان کے لیے خواب کی تعبیر تھا۔
انہوں نے کہا کہ چیمپئنز ٹرافی کی فتح ان کے کیریئر کا سب سے یادگار لمحہ ہے۔ انہوں نے بابر اعظم، فخر زمان، حسن علی، شاہین آفریدی اور شاداب خان جیسے کھلاڑیوں کو اپنے سامنے ابھرتے دیکھنا باعثِ فخر قرار دیا اور اپنے اہل خانہ، کوچز اور مداحوں کا شکریہ ادا کیا۔
سرفراز احمد کا کہنا تھا کہ پاکستان کرکٹ ہمیشہ ان کے دل کے قریب رہے گی اور وہ مستقبل میں بھی مختلف صورتوں میں کھیل کی خدمت جاری رکھیں گے۔سرفراز احمد کی ریٹائرمنٹ کے اعلان کے ساتھ ہی پاکستان کرکٹ کے ایک سنہری باب کا اختتام ہو گیا ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں