کراچی: قومی ٹیم اور کوئٹہ گلیڈی ایٹرز کے کپتان نے پریس کانفرنس میں انکشاف کیا ہے کہ ان پر شدید دباؤ ہے.
تفصیلات کے مطابق اتوار کے روز پشاور زلمی کے خلاف اپنی ٹیم کی قیادت کرنے والے سرفراز احمد پر فائنل کا پریشر تو ہی ہے، مگر وہ ایک اور دباؤ شدت سے محسوس کر رہے ہیں.
سرفراز احمد نے پریس کانفرنس میں مزاحیہ انداز میں کہا کہ ہر کوئی وئی آئی پی پاس مانگ رہا ہے، ٹکٹس اور پاسز کے لیے ان پر خاصا پریشر ہے.
انھوں نے ہنستے ہوئے کہا کہ ٹکٹس مانگے ہوئے دو دن ہوگئے، مگر اب تو بورڈ بھی ہمارا فون نہیں اٹھا رہا. لوگ کچھ خیال کریں، سب کو وی آئی پی ٹکٹس ہی چاہییں.
ان کی بات پر وہاں موجود صحافیوں نے خوب قہقہے لگائے، سرفراز احمد بھی مسکراتے رہے.
مزید پڑھیں: ڈیرن سیمی اور سرفرازاحمد پی ایس ایل کی ٹرافی جیتنے کے لیے پرعزم
خیال رہے کہ کوئٹہ گلیڈی ایٹرز نے پہلے پلے آف میں کانٹے دار مقابلے کے بعد پشاور کو شکست دے کر فائنل کے لیے کوالیفائی کیا تھا.
ادھر دوسرے پلے آف میں اسلام آباد فاتح رہی، جس کا بعد میں پشاور سے مقابلہ ہوا، جس نے یک طرفہ میچ میں بہ آسانی سابق چیمپیئن کو قابو کر لیا.
