کراچی: قومی کرکٹ ٹیم کے کپتان سرفراز احمد نے پوری قوم سے اپیل کی ہے کہ کل الیکشن میں حصہ لیں اور اپنا ووٹ ضرور کاسٹ کریں۔
تفصیلات کے مطابق دورہ زمبابوےکے بعد پاکستانی ٹیم کی وطن واپسی ہوئی، کپتان سرفراز احمد کراچی پہنچے جبکہ دیگر کھلاڑی مختلف فلائٹس کے ذریعے آج وطن واپس پہنچیں گے۔
ائیرپورٹ پر میڈیا سے گفتگو کرتے ہوئے سرفراز احمد کا کہنا تھا کہ سہ ملکی سیریز میں پاکستان نے بڑی کامیابی سمیٹی، ہم نے آسٹریلیا جیسی مضبوط ٹیم کو بھی شکست دی، فخر زمان کی پرفارمنس بہت اچھی ثابت ہوئی۔
مزید پڑھیں: عوام کل باہرنکلیں اور تاریخی الیکشن میں ووٹ ڈالیں، عمران خان
انہوں نے ملکی سیاست پر تبصرہ کرتے ہوئے قوم سے اپیل کی کہ وہ کل الیکشن میں حصہ لیں اور اپنا حق رائے دہی ضرور استعمال کریں۔
واضح رہے کہ کل 25 جولائی کو ملک بھر میں عام انتخابات کا انعقاد کیا جارہا ہے جس کی تیاری مکمل ہوچکی اور فوج کی نگرانی میں پولنگ اسٹیشنز تک بیلٹ پیرز کی ترسیل ہوچکی۔
ملک کی سیاسی جماعتوں اور آزاد امیدواران قومی و صوبائی اسمبلی کی مختلف نشستوں پر فتح حاصل کرنے کے لیے میدان میں اترے ہیں جبکہ کل کروڑوں پاکستانی اپنا حق رائے دہی استعمال کریں گے۔
یہ بھی پڑھیں: پاکستان نے زمبابوے کو ون ڈے سیریز میں وائٹ واش کردیا
خیال رہے کہ پاکستانی ٹیم سہ فریقی اور زمبابوے کے خلاف سیریز کھیلنے کے لیے زمبابوے گئی تھی، دونوں ایونٹس میں شاہینوں نے فتح اپنے نام کی جبکہ فخر زمان نے کئی عالمی ریکارڈ اپنے نام کیے۔
