اسلام آباد: مشیر خارجہ سرتاج عزیز کا کہنا ہے کہ نیپال میں لاپتہ ہونے والے سابق پاکستانی فوجی افسر کی تلاش کے لیے حکومت سرگرم عمل ہے۔
تفصیلات کے مطابق سینیٹ کا اجلاس چیئرمین سینٹ کی زیر صدارت ہوا۔ اجلاس میں ایم کیو ایم کی تحریک التوا پر سرتاج عزیز نے ایوان کو بتایا کہ 6 اپریل کو نیپال سے لاپتہ ہونے والے سابق پاکستانی فوجی افسر کرنل ریٹائرڈ حبیب کا تاحال پتہ نہیں چلا۔
انہوں نے بتایا کہ فوجی افسر کا نیپال میں بھارتی باڈر سے 5 کلو میٹر دور فون بند ہوگیا۔ حکومت پاکستان نے سفارتخانہ کے ذریعے نیپال میں گمشدگی کا مقدمہ درج کروایا۔ پاکستان میں بھی گمشدگی کامقدمہ درج ہے۔ کرنل حبیب کی فیملی نے اقوام متحدہ سے مدد کی اپیل کی ہے۔
مزید پڑھیں: ریٹائرڈ فوجی کی گمشدگی کے حوالے سے اہم انکشافات
چیئرمین سینیٹ نے تحریک التوا آئندہ اجلاس میں بحث کے لیے منظور کرلی۔ ملک میں پولیو کی صورتحال پر اطمینان بخش جواب نہ آنے پر اپوزیشن نے ایوان سے واک آوٹ بھی کیا۔
سینیٹ میں کورم کی کمی پر گھنٹیاں بجائی گئیں اور کورم پورا کیا گیا۔
سراج الحق کے سوال پر سرتاج عزیز نے ایوان کو بتایا کہ وزیر اعظم نے صدر اوباما کو آخری ایام میں جذبہ خیر سگالی کے طور پر ڈاکٹر عافیہ صدیقی کی رہائی کے لیے خط لکھا لیکن امریکہ نے ماننے سے انکار کر دیا۔ امریکہ اور پاکستان کے درمیان قیدیوں کے تبادلے کے معاہدے موجود ہیں۔
عافیہ صدیقی کے معاملے پر سینیٹر طلحہ محمود کو فلور نہ دیے جانے پر انہوں نے ایوان سے واک آؤٹ کیا۔
مقبوضہ کشمیر میں بھارتی مظالم پر ایوان میں توجہ دلائو نوٹس پر سرتاج عزیز کا کہنا تھا کہ پاکستان نے بھارتی مظالم پر اقوام متحدہ کے سیکریٹری جنرل اور او آئی سی کو خط لکھا۔
ان کے مطابق جولائی سے اب تک بھارتی مظالم سے سینکڑوں کشمیری شہید جبکہ ہزاروں زخمی ہوئے۔ 9 اپریل کو کشمیریوں نے جموں و کشمیر میں نام نہاد ضمنی انتخابات کا بائیکاٹ کیا۔ بھارتی مظالم سے 9 کشمیری شہید جبکہ 200 زخمی ہوئے۔
سرتاج عزیز نے بتایا کہ بھارتی فوج نے ایک کشمیری کو جیپ پر باندھ کر ڈھال کے طور پر استعمال کیا۔ پلوامہ گرلز کالج میں کئی طالبات کو شہید کیا گیا۔ بھارت کشمیریوں کو حق خود ارادیت دینے کے حق میں نہیں۔
مزید پڑھیں: کشمیری کو ڈھال بنانے پر بھارتی فوج پر مقدمہ
سینیٹ کا اجلاس کل صبح 10 بجے تک ملتوی کر دیا گیا۔
