ریاض : سعودی عرب کے سرحدی شہر جازان پر یمن میں برسرپیکار حوثی جنگجوؤں کی جانب سے گذشتہ شام داغا گیا بیلسٹک میزائل سعودی فورسز نے فضا میں ہی تباہ کردیا۔
تفصیلات کے مطابق سعودی کے شہر جازان پر یمن میں برسرپیکار حوثی جنگجوؤں کی جانب جمعے کی شام داغا جانے والا بیلسٹک میزائل سعودی عرب کی اتحادی افواج نے سرحد پر ہی مار گرایا ہے۔
عربی خبر رساں ادارے کا کہنا تھا کہ ایرانی حمایت یافتہ حوثی جنگجوؤں کی جانب سے فائر کیا جانے والا بیلسٹک میزائل گذشتہ روز شام 7 بج کر 17 منٹ پر سعودی عرب کے سرحدی شہر جازان پر داغا گیا تھا۔
عرب خبر رساں ادارے سے گفتگو کرتے ہوئے عرب اتحادی افواج کے ترجمان کرنل ترکی المالکی کا کہنا تھا کہ سعودی عرب کی جانب سے یمن میں آئینی حکومت کی معاونت کے لیے اتحاد بنایا گیا تھا، اس لیے حوثی جنگجو سعودی عرب کی شہری آبادی کو جان بوجھ پر ہدف بناتے ہیں۔
کرنل ترکی المالکی کا کہنا تھا کہ حوثی جنگجوؤں کو ایران کی مدد حاصل ہے، اس لیے وہ آئے روز سعودی عرب کی شہری آبادی کو نشانہ بنانے کی کوشش کرتے رہتے ہیں، حوثی جنگجو شہری آبادی پر میزائل حملے کرکے اقوام متحدہ کے قوانین کی خلاف ورزی کررہے ہیں۔
سعودی عرب کی اتحادی افواج کے ترجمان کا کہنا تھا کہ گذشتہ روز پیش آنے والے واقعے میں کسی کے زخمی ہونے کی اطلاعات موصول نہیں ہوئی ہیں۔
خیال رہے کہ حوثی جنگجوؤں کی جانب سے گذشتہ کئی ماہ سے سعودی عرب کی شہری آبادی کو نشانہ بنانے کےلیے کوششیں کررہا ہے اور اب تک 100 سے زائد بیلسٹک میزائل حملے کرچکا ہے جسے سعودی فضائی افواج فضا میں ہی تباہ کردیا تھا۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں
