پاکستان کرکٹ ٹیم کے فاسٹ بولر نمونیا کا شکار ہوگئے ہیں، سعودی سفیر نواف بن سعید المالکی بھی انکی صحتیابی کے لیے دعاگو ہیں۔
پاکستان کرکٹ ٹیم کے تیزی سے ابھرتے ہوئے فاسٹ بولر نسیم شاہ نمونیا کا شکار ہونے کے بعد انگلینڈ کے خلاف جاری ہوم سیریز سے باہر ہوگئے ہیں جب کہ نیوزی لینڈ میں شیڈول سہ ملکی ٹی ٹوئنٹی سیریز میں بھی ان کی شرکت مشکوک ہوگئی ہے۔
ان کی بیماری نے جہاں شائقین کرکٹ کو تشویش میں مبتلا کردیا ہے اور ان کی جلد صحتیابی کے لیے دعائیں کی جا رہی ہیں وہیں پاکستان میں سعودی عرب کے سفیر نواف بن سعید المالکی بھی ان کی صحت کے حوالے سے فکرمند ہوگئے ہیں۔
پاکستان میں سعودی عرب کے سفیر نواف بن سعید المالکی نے سماجی رابطوں کی ویب سائٹ ٹوئٹر پر قومی فاسٹ بولر کے لیے نیک خواہشات کا اظہار کیا ہے۔
انہوں نے دعائیہ ٹوئٹ کرتے ہوئے کہا ہے کہ ’’ہم آپ کی جلد صحتیابی کے خواہاں ہیں۔‘‘
ہم آپ کی جلد شفا یابی کے خواہاں ہیں @iNaseemShah 🇵🇰 pic.twitter.com/sT0EyNCk6i
— نواف بن سعيد المالكي (@AmbassadorNawaf) September 28, 2022
سعودی سفیر کے علاوہ شائقین کرکٹ کی بھی بڑی تعداد ان کی ورلڈ کپ سے قبل مکمل صحتیابی کے لیے دعا گو ہے۔
واضح رہے کہ نسیم شاہ آئندہ ماہ آسٹریلیا میں ہونے والے ٹی ٹوئنٹی ورلڈ کپ کے لیے قومی ٹیم کے اسکواڈ کا حصہ ہیں۔ قومی ٹیم ورلڈ کپ اور اس سے قبل نیوزی لینڈ میں سہ فریقی سیریز کھیلنے کیلیے 3 اکتوبر کو روانہ ہوگی۔
یہ بھی پڑھیں: قومی ٹیم کے فاسٹ باؤلر وائرل انفیکشن کے شکار ہو گئے
نسیم شاہ نے پاکستان کی نمائندگی کرتے ہوئے 13 ٹیسٹ میچز میں 33، تین ون ڈے میچز میں 10 جب کہ 6 ٹی ٹوئنٹی میچز میں 7 وکٹیں حاصل کر رکھی ہیں۔
