اللہ تعالیٰ نے سعودی عرب کو بیت اللہ کا حج کرنے والوں کی خدمت کا شرف بخشا ہے، سعودی سفیر
The news is by your side.

Advertisement

اللہ تعالیٰ نے سعودی عرب کو بیت اللہ کا حج کرنے والوں کی خدمت کا شرف بخشا ہے، سعودی سفیر

اسلام آباد : پاکستان میں سعودی عرب کے سفیر نواف بن سعید المالکی کا کہنا ہے کہ اللہ تعالیٰ نے سعودی عرب کو بیت اللہ کا حج کرنے والوں کی خدمت کا شرف بخشا ہے، خادم حرمین شریفین اور ان کی ولی عہد کی تعلیمات یہی ہیں کہ حجاج کرام اور عمرہ زائرین کو ہرممکن سہولت فراہم کی جائے۔

تفصیلات کے مطابق اسلام آباد میں سعودی سفارت خانے میں خطاب کرتے ہوئے سعودی سفیر کا کہنا تھا کہ حرمین شریفین شاہ سلمان بن عبدالعزیز آل سعود کی جانب سے پاکستان سے کچھ افراد کو اپنے ذاتی خرچ پر حج کروایا جارہا ہے، جو درحقیقت سعودی عرب کی طرف سے دنیا بھر کے مسلمانوں کے لیے اسلامی اخوت اور سلامتی کا پیغام ہے۔

نواف بن سعید المالکی کا کہنا تھا کہ سعودی حکومت حجاج کرام اور عمرہ زائرین کو ہرممکن سہولیات فراہم کرنے کی کوشش کرتی ہے اور اس مقصد کے لیے سعودی عرب نے اپنے تمام تر وسائل حجاج کرام اور عمرہ زائرین کے لیے وقف کردیے ہیں تاکہ وہ اپنے فرائض باآسانی ادا کرسکیں۔

اس موقع پر نگران وزیرمذہبی امور محمد یوسف شیخ نے کہا کہ سعودی عرب اور پاکستان کے دیرینہ تعلقات کئی دہائیوں سے ہیں اور گزرتے وقت کے ساتھ یہ تعلقات مزید مستحکم ہورہے ہیں۔

محمد یوسف شیخ کا کہنا تھا کہ سعودی عرب کی طرف سے کچھ پاکستانیوں کو بطور شاہی مہمان حج کروانا خادم حرمین شریفین کی پاکستانیوں سے محبت کا ثبوت ہے۔

بعد ازاں حج کی سعادت حاصل کرنے والے حجاج کرام کو سعودی سفیر کی طرف سے تحائف بھی پیش کیے گئے۔

یاد رہے کہ چند روز قبل اسلام آباد میں موجود سعودی سفارت خانے میں تعینات سفیر عمران خان کو مبارک باد دینے کے لیے بنی گالہ پہنچے تھے اور نیک خواہشات کا اظہار کیا تھا۔

سفیر نے سعودی حکام اور حکومت کا خصوصی پیغام عمران خان کو پہنچایا جبکہ مستقبل میں پاکستان کے ساتھ تعلقات کو مزید بڑھانے اور آپسی تعاون جاری رکھنے کے عزم کا اظہار کیا تھا۔

Comments

comments

یہ بھی پڑھیں