ریاض : سعودی عرب کی شوری ٰ کونسل کے رکن ڈاکٹر محمد عبداللہ آل عباس نے کہا ہے کہ مختلف ممالک سے روزگار کے لیے آنے والے لوگ مملکت کیلئے ناسور نہیں بلکہ ملکی تعمیر ترقی میں شراکت دار ہیں۔
یہ بات انہوں نے سعودی اکنامک فورم میں خطاب کے بعد میڈیا سے گفتگو کرتے ہوئے کہی، انہوں نے کہا کہ بعض لوگوں کا خیال ہے کہ غیر ملکی افراد سعودی عرب کے لیے کینسر کی طرح ہیں جو قطعی طور پر غلط بات ہے۔
ان کا کہنا تھا کہ حقیقت یہ ہے کہ غیر ملکی افراد بھی ملکی تعمیر و ترقی میں ہمارے برابر کے شریک رہے ہیں بلکہ سعودی عرب کو اب بھی ماہر اور تربیت یافتہ ہنر مند کارکنوں کی ضرورت ہے۔
ڈاکٹر محمد عبداللہ آل عباس کا کہنا تھا کہ میں غیر ملکیوں کا دفاع نہیں کر رہا لیکن ہمیں سچ بات کہنی چاہئے اور حقائق کو سامنے رکھتے ہوئے بات کرنی چاہیے جو لوگ غیر ملکی افراد کو مملکت کے لیے نقصان دہ تصور کرتے ہیں وہ غلطی پر ہیں۔
انہوں نے کہا کہ جب سعودی عرب معاشی ترقی کی جانب گامزن ہوا تھا تو ہمیں غیر ملکی افراد کی اشد ضرورت تھی ہمیں غیر ملکی کارکنوں کو اس نظر سے نہیں دیکھنا چاہئے۔
رکن شوری ٰ کونسل نے مزید کہا کہ یہ بات بھی درست ہے کہ آغاز میں مملکت میں ٹیکس اور فیسیں نہیں تھیں نہ ہی رقوم بھیجنے پر کسی قسم کی پابندی عائد تھی جس سے انہوں نے فائدہ اٹھایا تاہم یہ بھی درست ہے کہ غیر ملکی افراد نے سعودی عرب کی تعمیر و ترقی کے لیے اہم کردار ادا کیا ہے۔
