جدہ : سعودی عرب میں شدید بارشوں سے مختلف حادثات و واقعات میں بچوں سمیت بارہ افراد ہلاک اور متعدد زخمی ہوگئے.
مختلف شہروں میں بارشوں نے تباہی مچادی، کئی افراد سیلابی پانی میں بہہ کر جاں بحق ہو گئے جبکہ تین افراد کرنٹ لگنے سے جان سے ہاتھ دھو بیٹھے، 6بچے صوبہ یانگو میں اور جدہ کے مضافات میں ژالہ باری سے ہلاک ہوئے،خیبر، طائف، مکہ اور جدہ میں درجہ حرارت میں دس سینٹی گریڈ تک کمی ہوئی.
مکہ اور جدہ میں اسکول اور کالجز بند ہیں، کئی شاہراہوں پر جگہ جگہ بل بورڈ گرنے اور پانی جمع ہونے سے ٹریفک کا نظام برہم برہم ہوکر رہ گیا ہے، شہر میں شدید بارشوں کے باعث اندرون و بیرون ملک چلنے والی تمام پروازوں کو معطل کردیا گیا ہے.
سعودی عرب کے کرائسس اینڈ ڈیزاسٹر مینجمنٹ سینٹر نے مغربی ساحلی شہر میں شدید بارشوں کے پیش نظر تمام اہالیان جدہ اور مکہ سے گھروں میں رہنے کی اپیل کی ہے.
