The news is by your side.

Advertisement

سعودی عرب : فضائی مسافروں کیلئے بچوں سے متعلق اہم ہدایات

ریاض : سعودی ایئر لائن نے بچوں کے ہمراہ سفر کرنے والے مسافروں کو خاص ہدایات جاری کی ہیں جس کا مقصد مسافروں کو دیگر مشکلات سے محفوظ رکھنا ہے۔

اس حوالے سے سعودی عربین ایئرلائن السعودیہ کا کہنا ہے کہ شیرخوار بچوں کے ساتھ اندرون مملکت فضائی سفر کرنے والے مسافروں کو چاہئے کہ وہ مقررہ قواعد و ضوابط کا خیال رکھتے ہوئے برتھ سرٹیفکیٹ لازمی اپنے ساتھ رکھیں۔

سعودی ذرائع ابلاغ کے مطابق السعودیہ ایئر کی جانب سے نومولود و شیرخواربچوں کے ساتھ سفر کرنے کے لیے لازمی ہے کہ والدین ان کا پیدائشی سرٹیفکیٹ یا ابتدائی اطلاعاتی سرٹیفکیٹ بکنگ کاؤنٹر پر پیش کریں۔

ترجمان ایئرلائن کا مزید کہنا تھا کہ وہ افراد جو اپنے نومولود بچوں کے ساتھ سفر کرتے ہیں ان کے لیے لازمی ہے کہ بکنگ کے وقت بچوں کی تمام درکار معلومات کا اندراج کرائیں علاوہ ازیں ایئرپورٹ پر اصلی پیدائشی سرٹیفکیٹ پیش کریں۔

پیدائشی سرٹیفکیٹ نہ ہونے کی صورت میں ابتدائی سرٹیفکیٹ جسے عربی میں تبلیغ ولادہ کہا جاتا ہے کی اصل بکنگ کاؤنٹر پر پیش کریں۔

واضح رہے کہ سعودی عرب میں پیدا ہونے والے بچوں کا برتھ سرٹیفکیٹ ایک برس بعد اس وقت جاری کیا جاتا ہے جب انہیں پولیو ودیگر مقررہ ویکسین کا کورس مکمل کرالیا جاتا ہے۔

عارضی سرٹیفکیٹ تبلیغ ولادہ پیدائش کے فوری بعد جاری کیا جاتا ہے، عارضی سرٹیفکیٹ کی مدت ایک برس ہوتی ہے جسے بعد میں مستقل پیدائشی سرٹیفکیٹ سے تبدیل کیا جاتا ہے۔

Comments

یہ بھی پڑھیں