ریاض: سعودی عرب اور امریکا سمیت عرب ممالک نے اُردن کے شاہ عبداللہ ثانی کی حمایت کا اعلان کر دیا ہے۔
سعودی نیوز ایجنسی کے مطابق سعودی رائل کورٹ نے ایک بیان میں کہا ہے کہ مملکت شاہ عبداللہ اور شہزادہ الحسین بن عبداللہ ثانی کے فیصلوں اور امن و استحکام کے لیے اٹھائے اقدامات کی مکمل حمایت کرتی ہے۔
امریکی دفتر خارجہ نے بھی ایک بیان جاری کرتے ہوئے کہا کہ شاہ عبداللہ امریکا کے اہم اتحادی ہیں اور ان کو ہماری مکمل حمایت حاصل ہے، ہم اردن حکام سے اس حوالے سے مسلسل رابطے میں ہیں۔
خیال رہے کہ اردن میں گزشتہ رات بڑے پیمانے پر گرفتاریاں ہوئی ہیں، گرفتار کیے گئے افراد میں اردن کی رائل کورٹ کے سابق سربراہ باسم عوض اللہ بھی شامل ہیں، جب کہ اردن کے سابق شہزادے حمزہ بن الحسین نے ایک ویڈیو پوسٹ میں گھر پر نظر بند کیے جانے کا دعویٰ کیا۔
اطلاعات کے مطابق شاہ عبداللہ کے سوتیلے بھائی شہزادہ حمزہ سے حکام کی جانب سے ملک کو عدم استحکام کے حوالے کرنے کے مبینہ منصوبے سے متعلق سوالات پوچھے گئے ہیں۔
ہفتے کو اردن کی فوج کی جانب سے بھی بتایا گیا ہے کہ سابق شہزادے حمزہ بن حسین سے کہا گیا تھا کہ وہ ایسی سرگرمیاں ترک کر دیں جن سے ملک کے امن اور استحکام کو خطرہ لاحق ہو سکتا ہے۔
اس سلسلے میں دیگر عرب ممالک اور تنظیموں خلیج تعاون کونسل اور عرب لیگ نے بھی اردن کے شاہ عبداللہ کی حمایت کا اعلان کیا ہے، عرب ممالک میں مصر، کویت، متحدہ عرب امارات، قطر، بحرین، عراق، یمن، فلسطین اور لبنان شامل ہیں۔
واضح رہے کہ اردن کے سابق ولی عہد نے اپنے سوتیلے بھائی اور ملک کے بادشاہ پر کرپشن، نا اہلی اور لوگوں کو ہراساں کرنے کے الزامات عائد کیے تھے، بعد ازاں شاہ عبداللہ پر تنقید کرنے والوں کے خلاف بڑا کریک ڈاؤن شروع کیا گیا۔
