ریاض: سعودی عرب نے اصلاحات کے عمل کو آگے بڑھاتے ہوئے طلبہ وطالبات کے لیے ثقافتی اسکالرشپ پروگرام کا اعلان کردیا۔
عرب میڈیا کے مطابق مملکت کی تاریخ میں پہلی بار طلبہ و طالبات ثقافتی اسکالرشپ کے تحت بیرون ممالک کی یونیورسٹیوں میں فن وثقافت کے شعبے میں خصوصی تعلیم حاصل کر سکیں گے۔
سعودی وزیر ثقافت شہزادہ بدر بن عبداللہ بن فرحال آل سعود نے تاریخی اقدام کرتے ہوئے طالبعلموں کے لیے فن و ثقافت کے شعبے میں مہارت حاصل کے لیے نئی راہیں کھولی ہیں۔
ثقافتی میدان میں بیرون ملک سعودی اسکالر شپس کئی دہائیوں سے بند تھی تاہم اب طالبعلم بیرون ملک اسکالرشپ پر جا کر آثار قدیمہ، ڈیزائننگ، میوزیم ، موسیقی ، تھیٹر ، فلم پروڈکشن، لڑیچر اور بصری فنون کی تعلیم حاصل کر سکیں گے۔
واضح رہے کہ اصلاحتی عمل کے تحت سعودی عرب میں سخت گیر پالیسیوں میں نرمی کی جارہی ہے، اس ضمن میں خواتین کو ڈرائیوننگ کی اجازت اور سیاحت کے فروغ کے لیے آسانیاں فراہم کرنے کےساتھ ساتھ تھیٹر اور فن و ثقافت کے شعبوں میں خصوصی توجہ دی جارہی ہے۔
