ریاض: سعودی عرب میں رمضان المبارک کے دوران بینکوں اور مالیاتی اداروں کے اوقات کار کا اعلان کردیا گیا، مملکت بھر میں ترسیل زر کے مراکز روزانہ صبح 7 سے سہ پہر 4 بجے تک کھولے جائیں گے۔
سعودی ویب سائٹ کے مطابق سعودی عریبین مانیٹری اتھارٹی (ساما) نے اس سال رمضان اور عید الفطر کی تعطیلات کے دوران بینکوں، ترسیل زر کے مراکز اور ایکسپریس سروس کے اوقات کار کا اعلان کیا ہے۔
ساما کا کہنا ہے کہ رمضان کے دوران بینکوں کی شاخیں صبح 10 سے دوپہر 2 بجے تک کھلی رہیں گی۔
ساما نے بینکوں کو ہدایت کی ہے کہ مہیا وسائل کے ذریعے اپنی شاخوں کے ناموں اور اوقات کار سے کھاتے داروں کو مطلع کرنے کا اہتمام کریں۔
بیان کے مطابق مملکت بھر میں ترسیل زر کے مراکز روزانہ صبح 7 سے سہ پہر 4 بجے تک کھولے جائیں گے، ترسیل زر کے مراکز کے اوقات کار روزانہ 5 گھنٹے سے کم نہیں ہوں گے۔
ہدایات میں کہا گیا ہے کہ ترسیل زر کے مراکز کہاں کھلیں گے، کس وقت تک کھلیں گے اور کب سے کب تک کھلے رہیں گے اس کی تمام تفصیلات ترسیل زر کے مراکز کو اپنے طور پر صارفین کو دینا ہوگی۔ اس سلسلے میں تمام مراکز کرفیو کے اوقات کار کے پابند بھی ہوں گے۔
ساما نے مزید بتایا کہ اس سال عید الفطر کی چھٹی جمعرات 28 رمضان مطابق 21 مئی کی ڈیوٹی مکمل کر کے شروع ہوگی، 8 شوال اتوار 31 مئی کو مالیاتی ادارے دوبارہ کام کرنا شروع کردیں گے۔
ساما نے تمام بینکوں اور ترسیل زر کے مراکز پر پابندی لگائی ہے کہ وہ عید الفطر کی تعطیلات کے دوران اپنی بعض شاخیں کھولنے کا اہتمام کریں۔ کھاتے داروں کو اوقات کار، شاخوں کے ناموں اور ترسیل زر کے مراکز کے پتوں سے مطلع کرنے کا بھی اہتمام کریں۔
علاوہ ازیں تمام بینکوں اور ترسیل زر کے مراکز اپنی شاخوں اور اوقات کار کی تفصیلات سے ساما کو آگاہ کرنے کے بھی پابند ہوں گے۔
رمضان المبارک کے دوران سریع رفتار ترسیل زر کے سعودی نظام (سریع) ایکسپریس سروس کے اوقات کار صبح 10 سے لے کر سہ پہر 4 بجے تک کے ہوں گے۔
جمعرات 28 رمضان 21 مئی کو ایکسپریس سروس بند ہوجائے گی پھر 3 شوال 26 مئی منگل کو ایکسپریس سروس صارفین کے لیے دستیاب ہوگی۔
