ریاض : ہر سال ماہ رمضان کی آمد کے موقع پر سعودی عرب میں مقامی لوگ اور خصوصاً غیرملکی گداگروں کی آمد کا سلسلہ تیز ہوجاتا ہے جو اپنے ممالک کی بدنامی کا سبب بنتے ہیں۔
اس حوالے سے سعودی حکومت نے سخت اقدامات کیے ہیں جس کے تحت گداگروں کی سرکوبی کے لیے سیکیورٹی اداروں کو خصوصی ہدایات جاری کی گئی ہیں۔
سعودی عرب کے محکمہ امن عامہ کے ترجمان بریگیڈیئر سامی الشویرخ نے کہا ہے کہ سعودی عرب میں گداگری جرم ہے جس پر سخت سزا ہوگی۔
مقامی ذرائع ابلاغ کے مطابق انہوں نے کہا کہ تمام سیکیورٹی اہلکاروں کو ہدایت کی گئی ہے جہاں کہیں گداگر دیکھے جائیں تو انہیں فوری طور پر گرفتار کیا جائے۔
انہوں نے کہا ہے کہ سعودی عرب میں کسی بھی شکل و صورت اور کسی بھی سبب کی بنیاد پر گداگری کی اجازت نہیں۔
گداگری کرنا، اس پر اکسانا، اس پر مدد کرنا یا کسی بھی طرح کا تعاون فراہم کرنے پر ایک سال قید اور ایک لاکھ ریال تک جرمانہ ہوگا۔
ترجمان نے شہریوں اور مقیم غیر ملکیوں کو ہدایت کی ہے کہ صدقہ خیرات جمع کرنے کے ادارے قائم ہیں جن سے رجوع کیا جائے۔
محکمہ امن عامہ کے ترجمان بریگیڈیئر سامی الشویرخ نے مزید کہا کہ گداگروں کو صدقہ خیرات دینا اس مذموم عمل کی حوصلہ افزائی کے مترادف ہے۔
