ریاض : سعودی کابینہ نے خادم حرمین شریفین شاہ سلمان بن عبد العزیز کی زیر صدارت اجلاس میں اہم فیصلے کیے ہیں، اجلاس میں عمرہ، زیارت اور کورونا وائرس کی صورتحال پر تبادلہ خیال کیا گیا۔
تفصیلات کے مطابق خادم حرمین شریفین شاہ سلمان بن عبد العزیز کی سربراہی میں کابینہ کا آن لائن اجلاس ہوا ہے جس میں مقامی اور بین الاقوامی اہم امور اور معاملات پر غور کیا گیا اور اہم فیصلے کیے گیے۔
سعودی پریس ایجنسی کے مطابق اجلاس کے آغاز میں شاہ سلمان نے کابینہ ارکان کو امیر کویت شیخ نواف الاحمد کی طرف سے موصول ہونے والے مکتوب کے حوالے سے مطلع کیا ہے۔
کابینہ نے مجلس شوریٰ کی ترتیب نو کے فیصلے کو سراہتے ہوئے نئے ارکان شوری کے لیے نیک جذبات کا اظہار کیا ہے۔ کابینہ نے نوجوانوں کے مسائل اور ان کی ضرورتوں کو پورا کرنے کے لیے حکومتی اقدامات پر اطمینان کا اظہار کیا ہے۔
کابینہ نے کورونا وائرس کی وبا کے بعد والی عالمی سطح پر پیدا ہونے صورتحال اور مقامی معاشی صورتحال کا جائزہ لیا اور اس حوالے سے کیے جانے والے اقدامات پر تبادلہ خیال کیا۔
کابینہ ارکان نے آن لائن اجلاس میں عمرہ اور زیارت کی مرحلہ وار بحالی کے اقدامات اور اس حوالے سے حفاظتی تدابیر پر اطمینان کا اظہار کیا ہے۔
اس کے علاوہ بین الاقوامی سطح پر کورونا کی تازہ ترین صورتحال کا جائزہ لیا گیا اور وبا کے انسداد کے لیے مقامی کوششوں اور پیشگی تیاریوں کی تفصیل رپورٹ پر غور کیا ہے۔
