ریاض : سعودی وزارت صحت کے ترجمان ڈاکٹر العبد العالی نے کہا ہے کہ مملکت میں کورونا وائرس سے متاثرین کی یومیہ تعداد90 فیصد اور نازک کیسز کی تعداد45 فیصد کم ہوگئی ہے۔
سبق ویب کے مطابق وزارت صحت کے ترجمان نے اتوار کو کورونا کی صورتحال کے حوالے سے بریفنگ دیتے ہوئے کہا کہ وبا سے نمٹنے کے لیے اٹھائے جانے والے اقدامات سے مثبت نتائج ملے ہیں تاہم وبا دنیا میں اب بھی موجود ہے۔
انہوں نے کہا کہ مملکت بھر میں کورونا ویکسین کی60 ملین سے زیادہ خوراکیں دی جاچکی ہیں اور24 ملین سے زیادہ افراد دو خوراکیں لے چکے ہیں۔
ترجمان نے کہا کہ وبا سے نمٹنے کے لیے مملکت میں کورونا ایس او پیز کے حوالے سے تجزیہ کیا جاتا رہے گا، اب تک کے نتائج امید افزاء ہیں البتہ ماسک حفظان صحت کے لیے معمول بن گئے ہیں۔
ترجمان نے کہا کہ ماسک کی پابندی ختم کرنے کے حوالے سے فیصلہ حالات کے تناظر میں کیا جائے گا۔
