The news is by your side.

Advertisement

سعودی عرب میں کرونا کے مریض صحت یاب ہونے لگے

ریاض : سعودی عرب میں کورونا وائرس کے مریضوں کی صحت تسلی بخش ہے، اسپتالوں میں داخل مریض تیزی سے صحت یابی کی جانب گامزن ہیں۔

تفصیلات کے مطابق سعودی عرب میں کرونا مریضوں کی حالت خطرے سے باہر ہے، اس حوالے سے سعودی وزارت صحت کے ترجمان ڈاکٹر محمد العبد العالی کا کہنا ہے کہ سعودی عرب میں نئے کرونا وائرس کے مریضوں کی صحت تسلی بخش ہے لہٰذا خدشے کی کوئی بات نہیں۔

سعودی ذرائع ابلاغ کے مطابق ترجمان وزارصحت نے بتایا ہے کہ مملکت میں کرونا وائرس کے 15 مریضوں میں سے 14قطیف اور دمام کے اسپتالوں میں زیر علاج ہیں، ان سب کو دیگر مریضوں سے الگ تھلگ رکھا گیا ہے۔ ان کی حالت اب خطرے سے باہر ہے۔

ترجمان نے بتایا کہ کرونا وائرس کا ایک مریض امریکی شہری ہے، یہ فلپائن اور اٹلی سے ہوتے ہوئے سعودی عرب پہنچا تھا، اسکا علاج ریاض کے ایک اسپتال میں کیاجارہا ہے، اس کو تمام مریضوں سے الگ تھلگ کرکے انتہائی نگہداشت کے شعبے میں رکھا گیا ہے۔

العبد العالی کا کہنا تھا کہ کرونا وائرس سے متاثرین سے ملنے جلنے والوں کی مجموعی تعداد 468 ہے۔ ان سب کی فہرست تیار کرلی گئی تھی، ان کا معائنہ بھی کیا جاچکا ہے۔

انہوں نے مزید کہا کہ گھریلو قرنطینہ میں محصور شہریوں کی تعداد 1153ہے۔ یہ سب صحت مند ہیں۔ ان میں سے کوئی بھی کورونا وائرس کا مریض نہیں، انہیں احتیاطی تدبیر کے طور پر گھریلو قرنطینہ میں رکھا گیا ہے۔

fb-share-icon0
Tweet 20

Comments

comments

یہ بھی پڑھیں