The news is by your side.

سعودی عرب کا مصر کے حوالے سے بڑا قدم

ریاض: سعودی عرب نے مصر کے ساتھ تعاون کرتے ہوئے مرکزی بینک میں 5 ارب ڈالر کی ڈیپازٹ کی میعاد میں توسیع کر دی۔

سعودی خبررساں ادارے ایس پی اے کے مطابق خادم حرمین شریفین شاہ سلمان بن عبدالعزیز اور ولئ عہد شہزادہ محمد بن سلمان کی ہدایت پر مصر کے سینٹرل بینک میں 5 ارب ڈالر ڈیپازٹ کی میعاد میں توسیع کر دی گئی ہے۔

سعودی عرب کا کہنا تھا کہ مصری معیشت کے استحکام کے لیے فیاضانہ تعاون کا سلسلہ جاری رکھا جائے گا۔

سعودی حکومت کے ذرائع کے مطابق سعودی مدد کا دائرہ مصر کے سینٹرل بینک میں رقم ڈیپازٹ تک ہی محدود نہیں، بلکہ مصر میں سعودی عرب کے سرکاری و نجی سیکٹر کی جانب سے بھاری سرمایہ کاری بھی ہورہی ہے۔

واضح رہے کہ سعودی عرب اور مصر کے متعلقہ ادارے مختلف طریقوں سے تعاون کو فروغ دے رہے ہیں۔ بتایا جا رہا ہے کہ مصر میں اقتصادی اصلاحات پر عمل درآمد کے باعث ترقی کے امکانات ہیں۔

مصر نے پرائیویٹ سیکٹر کے فروغ اور مسابقت کی اہلیت بڑھانے کے لیے بھی مختلف اصلاحات کی ہیں، تاکہ علاقائی و بین الاقوامی اداروں کے ساتھ فنڈنگ کے نئے چینل کھل سکیں۔

Comments

یہ بھی پڑھیں