The news is by your side.

Advertisement

سعودی عرب: کرونا کی مفت تشخیص کے لیے ڈرائیو ان ٹیسٹ کی سہولت قائم

ریاض: سعودی عرب میں الاحسا ریجن میں کرونا وائرس کے ڈرائیو ان ٹیسٹ کی سہولت قائم کردی گئی جہاں ہر شخص کو مفت ٹیسٹ کی سہولت فراہم کی جارہی ہے۔

سعودی ویب سائٹ کے مطابق سعودی عرب میں الاحسا ریجن کی بلدیہ نے ادارہ صحت کے تعاون سے کرونا ڈرائیو ان ٹیسٹ کی سہولت فراہم کی ہے، وہ افراد جو کوویڈ 19 کا ٹیسٹ کروانے کے خواہاں ہیں انہیں یہ سہولت فراہم کی گئی ہے۔

کرونا ڈرائیو ان ٹیسٹ سینٹر الاحسا شہر میں شاہ فہد شاہراہ پر قائم کیا گیا ہے جہاں اعلیٰ تربیت یافتہ طبی عملہ جدید ترین سامان کے ساتھ موجود ہوگا۔

ڈرائیو ان ٹیسٹ سینٹر دو رویہ سڑک پر نصب کیا گیا ہے جہاں ٹیسٹ کیبن سے کچھ فاصلے پر اہلکار متعین ہوں گے جو ٹیسٹ کے لیے آنے والوں کی معلومات جس میں نام، شناختی کارڈ نمبر اور رابطہ نمبر کے علاوہ ایڈریس درج کریں گے۔

سینٹر کی نگرانی ریجنل ادارہ صحت کے اہلکار کریں گے، سینٹر میں موجود طبی اہلکار آنے والوں کے نمونے حاصل کر کے انہیں سلپ فراہم کردیں گے بعد ازاں ٹیسٹ کے نتیجے کے بارے میں انہیں موبائل ایس ایم ایس کے ذریعے مطلع کر دیا جائے گا۔

وزارت صحت کی جانب سے مختلف زبانوں میں کرونا آگاہی پروگرام بھی جاری کیا گیا ہے جس میں کرونا سے بچاؤ کے لیے احتیاطی تدابیر اور ہدایات درج ہیں۔

وزارت صحت نے ایپلی کشن بھی لانچ کی ہے جس کے ذریعے چند سوالات کا جواب دے کر کوئی بھی اپنے طور پر یہ معلوم کرسکتا ہے کہ اسے کرونا وائرس ہے یا نہیں۔

Comments

یہ بھی پڑھیں