ریاض : سعودی وزیر افرادی قوت و سماجی بہبود انجینیئر احمد الراجحی نے نجی اداروں میں انجینیئرنگ کی بیس فیصد اسامیاں سعودیوں کے لیے مختص کی ہیں۔
سعودی ذرائع ابلاغ کے مطابق یہ فیصلہ سعودی شہریوں کو بڑے پیمانے پر روزگار دلانے کی قومی مہم کے تحت کیا گیا ہے۔
وزارت افرادی قوت سرکاری اداروں اور سعودائزیشن کے نگراں اداروں کے تعاون و اشتراک سے پیشہ ورانہ ڈگریاں رکھنے والے سعودیوں کو مناسب روزگار دلانے کے پروگرام پر عمل کررہی ہے۔
بیس فیصد سعودائزیشن کا فیصلہ سعودی عرب کے ان تمام نجی اداروں پر نافذ ہوگا جن میں پانچ یا اس سے زیادہ انجینیئر کام کررہے ہوں۔
وزارت افرادی قوت و سماجی بہبود نے نجی اداروں میں انجینیئرنگ کی اسامیوں پر سعودیوں کی تقرریوں کی حوالے سے ایک گائیڈ بک بھی جاری کی ہے۔
اس گائیڈ بک میں تفصیل کے ساتھ بتایا گیا ہے کہ یہ فیصلہ نجی اداروں میں کب اور کیسے نافذ ہوگا۔اس حوالے سے ملازمت کے متلاشی انجینیئرز اور ملازمت دینے والے اداروں کے لیے الگ الگ ہدایات دی گئی ہیں۔
سعودی ذرائع ابلاغ کے مطابق اس کے علاوہ عوام کی مکمل آگاہی کیلئے وزارت نے گائیڈ بک سے متعلق تفصیلات اپنی سرکاری ویب سائٹ پر بھی جاری کردی ہیں۔
