ریاض: سعودی عرب میں مصنوعی تنفس کے آلات تیار کرنے والی فیکٹری کا افتتاح کیا گیا ہے، فیکٹری 15 ہزار سینی ٹائزر اور مصنوعی تنفس کے آلات تیار کرے گی۔
سعودی ویب سائٹ کے مطابق سعودی عرب میں مصنوعی تنفس کے آلات تیار کرنے والی فیکٹری کا افتتاح کیا گیا ہے۔
فیکٹری کا افتتاح گورنر عسیر شہزادہ ترکی بن طلال بن عبدالعزیز نے کیا، فیکٹری کرونا وائرس سے بچاؤ کے لیے استعمال کی جانے والی متعدد اشیا تیار کرے گی۔
فیکٹری کے منصوبے میں کنگ خالد یونیورسٹی کی فیکلٹی آف انجینیئرنگ، وزارت داخلہ، وزارت صحت اور عسیر میونسپلٹی شریک ہیں۔
فیکٹری کا منصوبہ کثیر المقاصد ہے جس میں سے ایک مقصد یہ بھی ہے کہ صحت خدمات فراہم کی جائیں، مخصوص زمروں کا علاج کیا جائے اور آجروں اور اجیروں پر کرونا کے منفی اثرات حتی الامکان کم کیے جائیں۔
فیکٹری 15 ہزار سینی ٹائزر اور مصنوعی تنفس کے آلات تیار کرے گی۔ فیکٹری میں کنگ خالد یونیورسٹی کی فیکلٹی آف انجینیئرنگ کے طلبہ بھی تعاون کریں گے۔
فیکٹری سے منسلک کیے جانے سے قبل طلبہ کو خصوصی ٹریننگ کورس کروائے گئے ہیں، طلبہ ایک طرف تو فیکلٹی میں اپنی تعلیم جاری رکھیں گے اور دوسری جانب فیکٹری میں باقاعدہ کام کریں گے۔
کرونا کی وبا ختم ہونے اور فیکلٹی سے تعلیم مکمل کرنے کے بعد طلبہ فیکٹری سے منسلک ہوجائیں گے۔
