ریاض : سعودی حکومت نے 31مارچ سے شہریوں کیلئے بیرون ملک پروازوں کی بحالی کا فیصلہ کیا ہے، مسافروں کو کورونا ایس اوپیز پر سختی سے عمل درآمد کرنا ہوگا۔
اس حوالے سے سعودی ایئرلائن انتظامیہ نے کہا ہے کہ شہریوں کے لیے بیرون ملک پروازوں کی بحالی کی تمام تیاریاں مکمل کی جاچکی ہیں۔
سعودی ذرائع ابلاغ کے مطابق سعودی ایئرلائن میں کمیوکیشن شعبے کے سربراہ انجینئر عبد اللہ الشہرانی نے میڈیا سے گفتگو کرتے ہوئے کہا ہے کہ 31مارچ سے بیرون ملک سفر کے خواہشمند شہری سعودی ایئرلائن کے ذریعہ جاسکتے ہیں۔
انہوں نے کہا کہ اس پروگرام پر عمل درآمد کے لیے ایئرلائن نے تمام تیاریاں مکمل کرلی ہیں جبکہ سفر کے لیے کورونا ایس او پیز سمیت تمام حفاظتی اقدامات کو یقینی بنایا جائے گا۔
ایئرلائن نے کہا ہے کہ کورونا بحران کے باعث شہریوں کا بیرون سفر معطل تھا جسے اب 31 مارچ سے بحال کیا جارہا ہے۔ سعودی ایئرلائن شہری ہوابازی سمیت وزارت صحت اور دیگر متعلقہ اداروں کے تعاون سے شہریوں کو بیرون ملک سفر کی سہولت فراہم کرنے کے لیے تیار ہے۔
