مکہ المکرمہ : سعودی عرب میں قانون نافذ کرنے والے ادارے کے اہلکاروں نے کامیاب کارراوئی کرتے ہوئے مکہ مکرمہ میں بھیک مانگنے کے الزام میں متعدد افراد کو گرفتار کرلیا ہے۔
سیکورٹی حکام نے مملکت کے مختلف علاقوں میں بھکاریوں کی نگرانی کرکے انہیں گرفتار کرنے کی کارروائیاں مزید تیز کردی ہیں۔
مکہ مکرمہ کے علاقے میں سیکیورٹی کی کوششوں کے نتیجے میں یمنی شہریت کے ایک رہائشی کو گرفتار کرلیا گیا جو مسجد میں نماز کے بعد نمازیوں سے براہ راست بھیک مانگتا تھا۔
اس کے علاوہ راہگیروں کے جذبات کا فائدہ اٹھاتے ہوئے ان سے بھیک مانگنے والے ایک اور یمنی شہری کو بھی حراست میں لے لیا گیا ہے، یہ یمنی شہری سڑکوں پر بھیک مانگ رہا تھا۔
پبلک سیکیورٹی اکاؤنٹ نے ٹوئٹر پر کہا کہ ایک صفائی کمپنی سے تعلق رکھنے والے بنگلہ دیشی باشندے کی نگرانی کی گئی اور اسے بھی رنگے ہاتھوں بھیک مانگتے ہوئے پکڑا گیا اور گرفتار کرلیا گیا۔
پبلک سیکیورٹی اکاؤنٹ نے کہا کہ شہری مکہ، ریاض اور شرقیہ میں کسی کو بھیک مانگتا دیکھیں تو 911 نمبر پر اطلاع دے دیں۔
ادارے کے ترجمان کا کہنا ہے کہ مملکت میں 999 نمبر پر بھکاریوں کی اطلاع دی جاسکتی ہے۔ حکام نے کہا بھکاری مافیا کا مقابلہ کرنا ہم سب کی ذمہ داری ہے۔
واضح رہے کہ اس سے قبل سعودی عرب میں ہی ایک غیر ملکی خاتون بھکاری کو گرفتار کیا گیا تھا جس کے پاس سے ہزاروں سعودی ریال برآمد ہوئے تھے۔
سعودی عرب میں بھیک مانگنے کے ذریعے بچوں، خواتین اور بوڑھوں کا استحصال انسانی اسمگلنگ کا جرم سمجھا جاتا ہے جب کہ سکیورٹی حکام نے دعویٰ کیا ہے کہ گداگری کی آڑ میں ہونے والا انسانی اسمگلنگ کا دھندہ بے نقاب کریں گے۔
