ریاض: سعودی فرمانروا کے فلاحی ادارے(کے ایس ریلیف) کی جانب سے پاکستان میں مریضوں کے علاج کے لیے رضاکارانہ طبی مہم کا آغاز کردیا گیا ہے۔
عرب میڈیا کی رپورٹ کے مطابق شاہ سلمان ہیومینیٹیرین ایڈ اینڈ ریلیف سینٹر (کے ایس ریلیف) نے پاکستان میں اندھے پن اور اس کی وجہ سے ہونے والی بیماریوں سے نمٹنے کے لیے رضاکارانہ طبی مہم کا آغاز کیا ہے۔
پاکستان میں موجود سعودی سفارت خانے کا کہنا ہے کہ یہ مہم البصر انٹرنیشنل فاؤنڈیشن کے تعاون سے شروع کی گئی ہے۔ صوبہ سندھ کے شہر کراچی، كنڈيارو، شکارپور جبکہ صوبہ بلوچستان کے ضلع خاران اور قلات میں 30 ہزار مریضوں کا معائنہ اور 2400 آپریشنز کیے جائیں گے۔
مہم کے تحت ایک ماہ کے اندر کمزور نظر والے افراد میں 6 ہزار عینکیں مفت تقسیم کی جائیں گی۔
یاد رہے کہ گزشتہ سال پاکستان میں اندھے پن کا مقابلہ کرنے کے لیے آخری رضا کارانہ طبی مہم کے دوران کے ایس ریلیف نے 2500 سے زائد آنکھوں کے آپریشنز مکمل کیے۔
پاکستانی عوام مفت آنکھوں کے معائنے، علاج اور ادویات سے مستفید ہوئے۔ خیال رہے کہ یہ پراجیکٹ سعودی عرب کے انسانی امداد کے منصوبوں کے تحت آتا ہے۔
