ریاض (17 اگست 2026): سعودی عرب نے 2027 کے حج سیزن سے قبل حجاج کی رہائش کے نئے ضوابط جاری کر دیے۔
سعودی وزارتِ سیاحت نے حج 2027 کے سلسلے میں سیزن کے دوران حجاج کی رہائش کے لیے استعمال ہونے والی رہائشی سہولیات کے تازہ ترین ضوابط اور درجہ بندی کے معیارات کی منظوری دے دی۔
وزارت نے مقدس شہروں مکہ مکرمہ اور مدینہ منورہ میں حجاج کی رہائش کے لیے مختص سہولیات سے متعلق خلاف ورزیوں کا ایک شیڈول بھی منظور کیا ہے۔
نئے معیارات کے تحت حج سیزن میں حجاج کی رہائش کی سہولیات کو دو زمروں میں تقسیم کیا جائے گا، ایک اکانومی اور دوسرا زمرہ فرسٹ کلاس۔ ہر زمرے کے لیے مخصوص تقاضے مقرر کیے گئے ہیں۔
ان ضوابط میں کامن ایریاز، مہمانوں کے کمرے، استقبالیہ کے مقامات، صفائی، دیکھ بھال اور مہمانوں کو فراہم کی جانے والی خدمات شامل ہیں۔ اس کے علاوہ معائنے اور نگرانی کے کئی مراحل بھی مقرر کیے گئے ہیں، جن میں لائسنس جاری کرنے سے قبل معائنہ، سہولت کے عملی طور پر کام شروع کرنے سے پہلے معائنہ، اور آپریشن کے پورے عرصے کے دوران مسلسل نگرانی شامل ہے۔
وزارت کے مطابق معائنے کے اس کثیر مرحلہ نظام کا مقصد ضوابط کی پابندی کو مضبوط بنانا اور حجاج کی رہائش فراہم کرنے والی سہولیات میں خدمات کے معیار کو بہتر بنانا ہے۔
وزارت نے 2027 کے حج سیزن کے لیے لائسنس حاصل کرنے کے خواہش مند رہائشی سہولت فراہم کرنے والے آپریٹرز پر زور دیا ہے کہ وہ ابتدائی مرحلے ہی میں نئے تقاضوں کو پورا کرنا شروع کریں اور درخواستیں جمع کرانے سے قبل تمام ضروری مرمت، دیکھ بھال اور تیاری کا کام مکمل کر لیں۔
وزارت کے ترجمان نصر الانصاری نے کہا کہ ان تبدیلیوں کا مقصد نگرانی اور انتظامی نظام کو مضبوط بنانا، مہمان نوازی کی سہولیات کی تیاری کو بہتر کرنا اور اس بات کو یقینی بنانا ہے کہ حجاج کی آمد سے قبل یہ سہولیات مطلوبہ معیار پر پوری اتریں۔
