ریاض: یونیورسٹیوں کی عالمی درجہ بندی میں سعودی عرب کی 10 جامعات بہترین قرار پائی ہیں۔
سعودی عرب کے لیے بڑا اعزاز یہ ہے کہ یہاں کی 10 یونیورسٹیاں دنیا کی بہترین جامعات میں شامل ہوگئیں۔ برطانوی میگزین ٹائمز نے جامعات کی ملکی، عرب اور بین الاقوامی درجہ بندی شایع کی ہے۔
برطانوی میگزین ٹائمز کی 2021 کے لیے جامعات کی درجہ بندی میں ‘کنگ عبدالعزیز یونیورسٹی جدہ’ عرب دنیا اور مملکت بھر میں سرفہرست رہی جبکہ عالمی سطح پر 201 واں نمبر حاصل کیا۔ اسی طرح ‘الفیصل پرائیویٹ یونیورسٹی’ مملکت میں دوسرے، عرب دنیا میں 51 ویں جبکہ عالمی سطح پر 251 واں نمبر پر رہی۔
درجہ بندی کے مطابق ‘کنگ سعود یونیورسٹی’ کو عرب دنیا میں 8 ویں، مملکت میں تیسرے اور عالمی سطح پر 401 ویں نمبر پر رکھا گیا ہے۔ ‘کنگ فہد پٹرولیم اینڈ منرل یونیورسٹی’ مملکت میں چوتھا نمبر حاصل کیا، عرب دنیا میں پانچویں اور عالمی سطح پر 501 ویں نمبر پر ریکارڈ کی گئی۔
سعودی عرب کی ‘کنگ خالد یونیورسٹی’ کو عرب دنیا میں 44 ویں، اندرون ملک 5ویں جبکہ بین الاقوامی جامعات میں 501 ویں نمبر پر رکھا ہے۔ ‘کنگ عبداللہ سائنس اینڈ ٹیکنالوجی یونیورسٹی’ عرب دنیا میں تیسرے نمبر پر رہی۔
‘امیر محمد بن فہد پرائیویٹ یونیورسٹی’ عرب دنیا میں چوتھے، ‘امام عبدالرحمن بن فیصل یونیورسٹی’ مملکت میں چھٹے اور عرب دنیا میں 61 ویں نمبر پر ہے۔ اسی طرح کنگ سعود ہیلتھ سائنس، کنگ فیصل، القصیم، ام القری، امیرہ نورہ، امیر سلطان، اور امیر سطام یونیورسٹی نے بھی درجہ بندی میں اپنی بہترین جگہ بنائی۔
