ریاض : سعودی حکومت نے کورونا وائرس پر قابو پانے اور اس کے پھیلاؤ کے سدباب کیلئے ایسے تمام فضائی مسافروں کو ہدایات جاری کی ہیں جو مملکت سے باہر جانا چاہ رہے ہیں۔
کونسل آف کوآپریٹو ہیلتھ انشورنس)سی سی ایچ آئی( کی سفارشات کے تحت بیرون ملک جانے والے سعودیوں کے لئے لازم قرار دیا گیا ہے کہ وہ روانگی سے24 گھنٹے قبل ٹریول ہیلتھ انشورنس حاصل کریں۔
اس حوالے سے سعودی ذرائع ابلاغ میں بتایا گیا ہے کہ پوری دنیا بھر میں پھیلی کورونا وبا کے باعث سعودی عرب کی کونسل آف کوآپریٹو ہیلتھ انشورنس اور متعلقہ صحت حکام سعودی شہریوں کو بین الاقوامی منزلوں کی طرف جانے کے لئے اضافی تحفظ فراہم کررہے ہیں۔
ہیلتھ انشورنس کے تحت مسافر کی روانگی کی تاریخ کے بعد سے30 دن تک کوویڈ19سے بحالی کے اخراجات اور صحت کی دیکھ بھال کا احاطہ کیا جائے گا۔
علاوہ ازیں بتایا گیا ہے کہ سعودی شہری جس ملک کا سفر کر رہے ہیں وہاں کے لئے ناگزیر قرنطینہ کا احاطہ اس ہیلتھ انشورنس میں نہیں کیا گیا ہے۔
دریں اثناء سعودی عرب کی وزارت صحت نے گذشتہ روز ہفتہ کو کورونا کے1142 نئے کیس رپورٹ کئے ہیں جس کے بعد مملکت میں کورونا وائرس سے متاثرہ افراد کی کل تعداد چار لاکھ 39 ہزار847 ہوگئی ہے۔
ایسا محسوس ہوتا ہے کہ صحتیاب ہونے والوں کی تعداد اور فعال کیسز کی تعداد میں اتار چڑھاو آتا رہتا ہے۔ فی الحال 8815 کورونا کے مریض اسپتالوں میں موجود ہیں جن میں سے 1329 ایسے ہیں جن کی حالت خطرے سے باہر نہیں ہے۔
وا ضح رہے کہ سعودی حکومت کی جانب سے عوام کی صحت کے لیے کیے گئے مؤثر اور بروقت اقدامات کے باعث کورونا وائرس سے متاثرہ کے مریضوں میں صحت یابی کی شرح 96.3 فیصد پر مستحکم ہے۔
گذشتہ روز ریاض میں مجموعی طور پر کورونا کے336 کیسز، مکہ مکرمہ میں250 اور مشرقی ریجن میں 158 کیسزریکارڈ کئے گئے۔ الجوف ایک ایسا علاقہ ہے جہاں سب سے کم یعنی صرف 6 کیسز سامنے آئے ہیں۔
اعداد و شمار کے مطابق گذشتہ 24 گھنٹے میں کوروناوائرس سے مجموعی طور پر 1089 افراد صحت یاب ہوئے جس سے مملکت میں صحت یاب ہونے والوں کی کل 423795 ہوگئی ہے۔
کوویڈ19 کی ویکسین183082 خوراکوں کی یومیہ شرح سے دی جا رہی ہے اور تقریباً 12.8 ملین خوراکیں دی جا چکی ہیں۔ اب تک 36.7فیصد آبادی کو وبائی مرض کی ویکسین کی کم از کم ایک خوراک مل چکی ہے۔
وزارت صحت نے ٹیسٹنگ ہب ، ویکسین سینٹرز اور علاج مراکز کے طور پر کلینکس قائم کئے ہیں۔ صحتی ایپ کے ذریعے ان کلینکس سے اپائنٹ منٹ لی جا سکتی ہے۔
سعودی عرب نے اب تک 18449145 کورونا ٹیسٹ کئے ہیں جن میں سے 78608 ٹیسٹ گزشتہ 24 گھنٹوں کے دوران کئے گئے ہیں۔ مملکت میں کورونا وائرس سے مجموعی طور پر ہلاک ہونے والوں کی تعداد 7237 ہو چکی ہے۔
