The news is by your side.

Advertisement

سعودی حکومت کا تارکین وطن کیلئے اہم اعلان

ریاض : سعودی حکومت نے واضح کیا ہے کہ سوشل میڈیا پر سیاحوں اور مقیم غیرملکیوں کو اجازت نامے جاری کیے جانے سے متعلق افواہوں پر یقین نہ کیا جائے، اس حوالے سے ہدایات جلد جاری کردی جائیں گی۔

تفصیلات کے مطابق سعودی محکمہ پاسپورٹ نے سوشل میڈیا پر گردش کرنے والی اطلاعات سے متعلق وضاحت کی ہے جس میں کہا جارہا تھا کہ محکمہ پاسپورٹ جمعرات 13 اگست 2020 سے سیاحوں اور مقیم غیرملکیوں کو مملکت آنے جانے کے اجازت نامے جاری کرنے والا ہے۔

سبق ویب سائٹ کے مطابق ترجمان محکمہ پاسپورٹ نے اپنے بیا ن میں کہا ہے کہ سوشل میڈیا کی یہ اطلاع غلط ہے، اس قسم کا فیصلہ جب بھی ہوگا اور اس حوالے سے جب بھی اعلی قیادت کی جانب سے ہدایات ملیں گی ان سے بروقت سرکاری چینلز کے ذریعے مطلع کردیا جائے گا۔

بیان میں مزید کہا گیا کہ فیصلے کی باقاعدہ اطلاع دی جائے گی اور اس سلسلے میں تاخیر سے کام نہیں لیا جائے گا۔
ترجمان سعودی محکمہ پاسپورٹ کا مزید کہنا تھا کہ کورونا وبا کا بحران ختم ہونے سے پہلے کسی بھی مقیم غیرملکی کو سعودی عرب آنے کی اجازت دی جائے گی نہ جانے کی۔

ترجمان کا کہنا تھا کہ جب بھی اجازت کا فیصلہ ہوگا اس کا باقاعدہ اعلان ہوگا البتہ انسانی بنیادوں پر آنے جانے کے اجازت نامے اس پابندی سے مستثنی تھے، ہیں اور رہیں گے۔

یاد رہے کہ سعودی عرب کی جنرل اتھارٹی سول ایوی ایشن (جی اے سی اے ) نے بھی اس سے قبل اکتوبر سے بین الاقوامی فلائٹس کی بحالی کی خبروں کو من گھڑت قرار دیا تھا۔ جی اے سی اے کی جانب سے وضاحت کی گئی تھی کہ ایسا کو ئی سرکلر جاری نہیں کیا گیا۔

Comments

یہ بھی پڑھیں