ریاض : سعودی حکومت نے ملکی اور غیرملکی افراد کی آسانی اور سہولت کیلئے اہم فیصلے کیے ہیں جس کے تحت پاسپورٹ سے متعلق مسائل گھر بیٹھے حل کیے جاسکتے ہیں۔
سعودی عرب میں محکمہ پاسپورٹ نے کہا ہے کہ16 امور آن لائن "ابشر” پلیٹ فارم کے ذریعے انجام دیے جاسکتے ہیں، اس کے لیے جوازات کے دفاتر سے رجوع کرنے کی ضرورت نہیں ہے۔
سعودی عرب کے ذرائع ابلاغ کے مطابق محکمہ پاسپورٹ نے بیان میں کہا کہ ڈیجیٹل ٹیکنالوجی کی بدولت محکمہ پاسپورٹ ابشر پلیٹ فارم کے ذریعے بہت سے کام کررہا ہے، ان کاموں کے لیے دفاتر آنے کی ضرورت نہیں، یہ سہولت وقت بچانے کے لیے دی جارہی ہے۔
محکمہ پاسپورٹ نے بتایا کہ عسکری اداروں کے اہلکار سفری اجازت نامہ آن لائن حاصل کرسکتے ہیں۔ نئے عملے اور زائرین کی مملکت آمد سے متعلق استفسار، فنگر پرنٹسِ مطلوبہ خدمات فیس کا بیلنس یا مقیم غیرملکی کی رپورٹ کے بارے میں معلومات سمیت کئی کام آن لائن انجام دیے جارہے ہیں۔
بیان میں محکمہ پاسپورٹ کا کہنا ہے کہ اقامے کے موثر ہونے نہ ہونے، مقیم غیرملکیوں کی ہیلتھ انشورنس کے مؤثر ہونے، اہل خانہ سے متعلق معلومات، پاسپورٹ سے متعلق استفسار، سفر کے ریکارڈ، بیرون مملکت سے عملے کی واپسی سے متعلق استفسار، حج کے استحقاق، خروج و عودہ ویزے کے ریکارڈ اور سرحدی اندراج نمبر معلوم کرنے کے لیے مقامی شہریوں یا مقیم غیرملکیوں کو محکمہ پاسپورٹ کے دفاتر آنے کی ضرورت نہیں یہ تمام کام آن لائن انجام دیے جارہے ہیں۔