مکہ المکرمہ : پاکستان سے سعودی عرب کا موٹر سائیکل پر سفر کرنے والے پاکستانی بائیکر ابرار حسن کا کہنا ہے کہ موٹر سائیکل پر عمرے کے لیے مکہ المکرمہ جانا میرا دیرینہ خواب تھا۔
پاکستانی بائیکر اور وی لاگر ابرار حسن 80 سے زائد ممالک کا سفر کرچکے ہیں، جن میں سے کم سے کم 12 ممالک کا سفر انہوں نے موٹرسائیکل پر کیا ہے۔
سعودی ذرائع ابلاغ کے مطابق رواں سال ابرار حسن نے فیصلہ کیا کہ ان کا اپنے دیرینہ خواب کو پورا کرنے کا وقت آگیا ہے، ان کا یہ خواب عمرے کی ادائیگی کے لیے موٹرسائیکل پر سعودی عرب جانا تھا۔
رواں سال نو فروری کو ابرار حسن اپنے آبائی قصبے ننکانہ صاحب سے سفر پر روانہ ہوئے، اس سفر میں انہوں نے تین براعظموں کو عبور کیا اور 50 دن تک موٹرسائیکل پر سفر کرنے کے بعد 27 مارچ کو مدینہ پہنچے، مدینہ سے وہ مکہ گئے اور عمرہ ادا کیا۔
مدینہ سے عرب نیوز سے گفتگو کرتے ہوئے انہوں نے بتایا کہ یہ ہمیشہ سے میرا خواب تھا (موٹر سائیکل پر سعودی عرب کا سفر کرنا) اور یہ اس سال پورا ہوگیا۔
شاید کچھ احساسات ہیں جو آپ الفاظ میں بیان نہیں کرسکتے۔ لہٰذا میرے لیے سب کچھ غیر حقیقی رہا ہے اور مجھے اس ہر ایک لمحے سے محبت ہے۔
واضح رہے کہ ابرار حسن پیشے کے لحاظ سے ایک مکینیکل انجینیئر ہیں اور ایک جرمن کمپنی سے وابستہ ہیں۔
پاکستانی بائیکر ابرار حسن کو بچپن سے ہی ایڈونچر اور فوٹو گرافی کا شوق ہے، ان کا کہنا تھا کہ متعدد سرحدوں کو عبور کرنا اور راستے میں بہت سے لوگوں سے ملنا ایک حیرت انگیز تجربہ تھا۔
لیکن خصوصی برکت یہ تھی کہ رمضان کی آمد سے چند دن پہلے مدینہ پہنچ کر پہلا روزہ وہیں رکھا۔ ابرار حسن نے سعودی عرب کے عوام کے "پرتپاک استقبال‘” اور انہیں ملنے والی محبت پر شکریہ ادا کیا۔
ایک یادگار تجربہ بیان کرتے ہوئے انہوں نے بتایا کہ ان کی سعودی عرب میں داخل ہونے کے فوراً بعد ایک ڈھابے پر چائے فروش خواتین سے ملاقات ہوئی تھی۔
انہوں نے اس حوالے سے کہا کہ جب انہیں معلوم ہوا کہ میں پاکستان سے موٹرسائیکل پر عمرہ کرنے جا رہا ہوں تو انہوں نے مجھ سے کوئی پیسہ نہیں لیا اور کہا کہ آپ ہمارے مہمان ہیں۔
كرم سعودي أصيل بعفوية وبساطة..
رحال على دراجته يلاقي سيدتان تبيعان على أحد طرق المملكة وبكرم سعودي أصيل تكرمانه مما لديهما. pic.twitter.com/d5FrAVyA7S
— هاشتاق السعودية (@HashKSA) April 28, 2022
خواتین کے ساتھ ابرار حسن کی بات چیت کی ایک ویڈیو انٹرنیٹ پر وائرل ہوئی اور انہیں مملکت میں شہرت حاصل ہوگئی۔
ان کا کہنا تھا کہ جب بھی میں اپنی موٹرسائیکل کے ساتھ باہر جاتا ہوں، اس وقت جو حمایت اور محبت مل رہی ہے وہ ناقابل یقین ہے۔
سعودی عوام کے پیار نے ابرار حسن کو مجبور کیا کہ وہ مملکت میں اپنا قیام بڑھائیں اور دوسرے شہروں کی سیر کرے۔
سعودی عرب میں اپنے سفر کے حوالے سے انہوں نے بتایا کہ میں اب تک ریاض، مدینہ اور مکہ جا چکا ہوں لیکن آئندہ چند دنوں میں سعودی عرب کے مختلف شہروں کا سفر شروع کر رہا ہوں۔
انہوں نے مزید بتایا کہ ان مقامات کے علاوہ میں جدہ، ابھا، الباحہ، جازان اور العلا بھی جاؤں گا۔
