ریاض : سعودی عرب میں رمضان کی آمد کے ساتھ ہی مختلف شہروں میں گھریلو ملازماؤں کی طلب میں غیرمعمولی اضافہ دیکھنے میں آرہا ہے۔
سبق نیوز کے مطابق حائل ریجن میں کنٹریکٹ پرخادمائیں فراہم کرنے والی کمپنیوں کی جانب سے ایک خادمہ کی ماہانہ تنخواہ6500 ریال پیشگی طلب کی جارہی ہے۔
خادمائیں فراہم کرنے والی کمپنیوں کی شرط ہوتی ہے کہ ماہانہ اجرت پرفراہم کی جانے والی خادمہ کا کام اگرپسند نہ آئے تو تین دن کے اندر اس کے بارے میں رپورٹ کرنے پرخادمہ کو تبدیل کیا جاتا ہے بصورت دیگر ادا کی گئی تنخواہ واپس نہیں کی جاتی۔
خادماوں کی فراہمی کا سلسلہ غیرقانونی طریقے سے بھی جاری ہے جس کے لیے مڈل مین کا کردار ادا کرنے والی خواتین ایجنٹس بھی رمضان کی آمد کے ساتھ ہی فعال ہوگئی ہیں۔
خادماؤں کی طلب میں اضافہ کو دیکھتے ہوئے ایجنٹ خواتین کی جانب سے منہ مانگی رقم طلب کی جارہی ہے۔
سوشل میڈیا پربھی اس قسم کے اشتہارات وائرل ہورہے ہیں جن میں خادمہ دستیاب ہے کے عنوان سے رابطہ کرنے کو کہا جاتا ہے۔
واضح رہے کہ ماہ رمضان سے قبل خادماؤں کی ماہانہ تنخواہ 12 سو سے 2 ہزار ریال مقرر تھی اس میں اب غیرمعمولی طور پر اضافہ ہوگیا ہے۔
