ریاض: سعودی عرب جلد طلبا کے لیے اسکولوں میں حاضری کا نیا طریقہ کار جاری کرے گا۔
عرب میڈیا کی رپورٹ کے مطابق سعودی وزارت تعلیم کی ترجمان ابستام حسن الشہری کا کہنا ہے کہ جلد سکولوں میں حاضری کے طریقہ کار کا باقاعدہ اعلان ہوگا۔
انہوں نے بتایا کہ اسکولوں میں حاضری کی صورت میں ایس او پیز پر عمل درآمد یقینی بنایا جائے گا، 12 برس سے کم عمر کے وہ طلبا جو مڈل اسکول میں داخلے کراچکے ہوں گے ان کے تعلیمی سال کا آغاز آن لائن ہوگا۔ ایسے طالب علم جنہیں دائمی امراض لاحق ہیں انہیں ویکسینیشن سے روک دیا گیا ہے۔
وزیر کا کہنا تھا کہ مذکورہ طلبا بھی آن لائن تعلیم حاصل کریں گے، سعودی عرب کے سکولوں میں اصلاح و مرمت کا 96 فیصد کام مکمل ہوچکا ہے، وزارت نے 57 ملین ریال کا بجٹ کورونا ایس او پیز کے لیے مختص کردیا۔
سعودی عرب نے بڑی کامیابی حاصل کرلی
ابستام حسن نے کہا ہم نیا تعلیمی سال شروع کرنے سے متعلق بے حد سنجیدہ ہیں۔ وہ طلبا جو کورونا ویکسین کی دونوں خوراکیں لے چکے ہوں گے وہ سکول میں باقاعدہ کلاسوں میں تعلیم حاصل کریں گے جبکہ پرائمری سکول کے طلبہ کو ’مدرستی‘ پلیٹ فارم کے ذریعے آن لائن تعلیم دی جائے گی۔
ترجمان کا کہنا تھا کہ ویکسین کا مقصد سعودی عرب میں 70 فیصد افراد کی مکمل ویکسینیشن کرا کے قوت مدافعت مضبوط کرنا ہے۔ اگر یہ مشن 30 اکتوبر سے قبل ہی مکمل ہوگیا تو معمول کے مطابق اصول ہوں گے۔
خیال رہے کہ سعودی عرب میں مڈل اور ثانوی سکولوں کی طالبات و طلبہ کی تعداد 3.1 ملین ہے۔ ان میں سے 70 فیصد ویکسین لگوا چکے ہیں۔
