ریاض: سعودی عرب میں پارکوں اور ساحلوں میں تفریح کے لیے آنے والوں کے لیے ایس او پیز جاری کر دیے گئے۔
تفصیلات کے مطابق سعودی وزارتِ داخلہ کی جانب سے پارکوں اور ساحلوں سمیت تمام کھلے تفریحی مقامات پر کرونا وائرس سے بچاؤ کے لیے ایس او پیز کا اعلان کر دیا گیا۔
اس سلسلے میں سعودی وزارت کی طرف سے ایک گائیڈ بک جاری کی گئی ہے، جس میں ہدایت کی گئی ہے کہ تفریحی مقامات کے دروازوں، انتظار گاہوں، ٹکٹ کاؤنٹرز، واش رومز اور فوڈ کورٹس پر ڈیڑھ سے 2 میٹر سماجی فاصلہ یقینی بنانے کے لیے فرش پر نشانات لگائے جائیں۔
ان مقامات پر بھی فاصلے کی پابندی کے نشانات لگائے جائیں گے جہاں لوگ بیٹھتے ہوں یا کھڑے ہوتے ہوں، یا جہاں کرسیاں رکھی گئی ہوں۔ نیز، تمام تفریحی مقامات پر بچوں کو کھیلنے سے روکا جائے گا۔
سعودی عرب: کرونا وائرس کی روک تھام کے لیے ایک اور اہم قدم
گائیڈ لائنز کے مطابق بچوں کو کرونا وائرس سے بچانے کے لیے جھولوں کی جگہوں کو ہر 2 گھنٹے بعد سینیٹائز کیا جائے گا، ان مقامات پر بھیڑ بھی نہیں ہونے دی جائے گی۔ تفریحی مقامات پر سائیکلیں، صحرائی موٹر سائیکلیں کرائے پر دی جا سکیں گی تاہم استعمال کرنے والے ایک دوسرے کے قریب نہیں جائیں گے۔
ایک صحرائی موٹر سائیکل صرف ایک ہی شخص استعمال کرے گا اور دوسرے شخص کے استعمال سے قبل اسے سینیٹائز کیا جائے گا، تفریحی مقامات پر ایسے پروگرامز سے سختی سے پرہیز کیا جائے گا جن میں ملنے جلنے کے امکانات زیادہ ہوں۔
دیگر ایس او پیز میں نمایاں مقامات پر ٹشو پیپرز کی فراہمی، تفریحی مقامات کی پانی اور صابن سے صفائی، واش رومز اور طہارت خانوں میں خود کار ٹونٹیوں کی تنصیب اور ان کی مسلسل صفائی اور سینیٹائز کرنے کا اہتمام شامل ہیں۔
