ریاض : سعودی عدالت نے اہلیہ کو قتل کرنے والے شخص کو سخت سزا سنادی جس کے بعد مجرم کو موت کے گھاٹ اتار دیا گیا۔
تفصیلات کے مطابق سعودی عرب کے مشرقی ریجن میں مقامی حکام نے بیوی کو وحشیانہ طریقے سے قتل کرنے کا الزام ثابت ہوجانے پر سعودی شہری کو موت کی سزا دی ہے۔
سرکاری خبر رساں ایجنسی ایس پی اے کے مطابق وزارت داخلہ نے بیان میں کہا ہے کہ سعودی شہری مھند بن علی بن ابراہیم العسیری نے لیبیا سے تعلق رکھنے والی اپنی بیوی رحاب علی محمد الھمالی کو کو قتل کرکے اس کے ٹکڑے کردیے تھے۔
ملزم واردات کے بعد فرار ہوگیا تھا۔ پولیس نے گرفتارکرکے اسے دمام کی فوجداری عدالت کے حوالے کیا تھا۔
مزید پڑھیں : شوہر کی اہلیہ کو سفاکانہ طریقے سے قتل کرنے کی کوشش، ویڈیو وائرل
عدالت نے قتل کا الزام ثابت ہوجانے پر موت کی سزا سنادی تھی جس کی توثیق پہلے اپیل کورٹ اور پھر سپریم کورٹ کی جانب سے کی گئی تھی۔
ایوان شاہی نےعدالتی فیصلے پر عمل درآمد کا شاہی فرمان جاری کیا جس کے بعد فیصلے پر عملدرآمد کردیا گیا۔
