ریاض: سعودی عرب کی جانب سے چین میں ایک نمائش کا اہتمام کیا جارہا ہے جس کا مقصد چینی سیاحوں کو سعودی عرب کی طرف متوجہ کرنا ہے۔
اردو نیوز کے مطابق سعودی محکمہ سیاحت 13 سے 17 مارچ تک چین میں سیاحت کے فروغ کے لیے تعارفی نمائش کا انعقاد کرے گا۔
تعارفی نمائش کے دوران چینی شہریوں کو سعودی عرب میں سیاحت کے لیے پسندیدہ مقامات سے متعارف کروایا جائے گا۔
محکمہ سیاحت بیجنگ اور شنگھائی سمیت چین کے بڑے شہروں میں سعودی عرب کے ایسے سیاحتی مقامات کا پر کشش تعارف کروائے گا جنہیں چینی اب تک دریافت نہیں کر سکے ہیں۔
چینی میڈیا کے مطابق ہوٹل اور فضائی کمپنیاں سعودی نمائش میں شریک ہوں گی، چین کی سو سے زیاہ کمپنیاں اور ادارے چینی سیاحوں کے سوالات کے جوابات دیں گے۔
چینی سیاحوں کو بتایا جائے گا کہ سعودی عرب دنیا کے محفوظ ترین ممالک میں سے ایک ہے۔
یہاں شاپنگ مالز، ریستوران، ساحل اور تفریحی مقامات بھی ہیں، مملکت میں 10 ہزار سے زیادہ تاریخی مقامات ہیں ان میں وہ بھی ہیں جنہیں یونیسکو عالمی ورثے کی فہرست میں شامل کیے ہوئے ہے۔
